Sampdoria inkhel kan en - Klopp

Liverpool manager Jurgen Klopp chuan Watford hmachhawn tura an inbuatsaihna kawngah Serie A club Sampdoria inkhel an en nasat thu a sawi!

Vawiin tlai dar 5:00-ah Watford chuan Liverpool an mikhual dawn a, Premier League kai thar club hi coach thar Claudio Ranieri enkawlna hnuaiah an khel dawn.

Italian coach-in club a enkawl hnuhnung ber chu Sampdoria an ni a, Serie A club-ah hian hna a thawk ṭha hle - Liverpool-in Ranieri 'style' hriatchian nana Watford aia Ranieri club hlui inkhel an en hi a mak lo.

Klopp chuan, "Ranieri hi coach ṭha tak, khawvel hmun hrang hranga hna lo thawk tawh a ni a, a club hnuhnung berah pawh a hlawhtling hle. A career a siamthar leh a ni ber a, ka lawmpui viau bawk.

"Liverpool an tum dawn leh dawn loh hi a ngaihtuah vakin ka ring lo a, result ṭha thei ang ber nei turin a inpuahchah tawp ang a, an theihna zawng zawngin an khel ang.

"Ranieri an neih tak avangin kan inbuatsaihna pawh kan tidanglam hret a, Claudio hian khelh dan phung bik a neih avangin Watford aiin Sampdoria inkhel kan en nasa zawk," a ti!

Klopp chuan a pawimawh ber erawh anmahni an nih thu sawiin, "Kan rilru kan pek berna tur erawh kan khelh danah a ni," a ti a, khingpui team khelh dan hrechiang mah se khelh ṭhat loh chuan awmzia a neih loh thu a sawi.

Watford hian Premier League match sarihah point sarih chiah an la neih avangin coach Xisco an ban a, a hmun ruak luah tur hian Premier League-a ropui taka Leicester City lo champion pui tawhtu Ranieri hi an lalut.

Watford hian Ranieri hnuaia an league match hmasa pariatah Liverpool, Everton, Southampton, Arsenal, Manchester United, Leicester City, Chelsea leh Manchester City an hmachhawn dawn a, an tan Reds lo hneh nghal hi 'tihmakmawh' a ni.

Liverpool hian Thawhlehni zanah Champions League match an khel zui dawn a, khualmuala Atletico Madrid lenchilh tur an nih avangin Klopp-a'n zaninah a player ṭha a khek ṭhen ang em, tih chu zawhna awm mek a ni - vawiin tlai inkhel a hmuhnawm dawn.