Brazil leh Argentina kal fawr

South America aṭanga World Cup 2022 khel tur zawnnaah Brazil leh Argentina an kal fawr hle a, ram pahnih hi chhiar kawp danin la tliang chiang lo mah se fans tan chuan Qatar panna tur ticket a lak ngam tawh.

Brazil hian an mikhual Uruguay 4-1 a sawpin point 31 an nei ta a, inkhel dangah Argentina chuan Peru 1-0 in an hneh ve bawk. Ram pahnih hian midangte aiin match khatin an khel tlem chungin table-ah an sang fal dun hle.

Tite-a enkawl Brazil tan Neymar chuan Fred hnen aṭanga a ball hmuh chu tawih zetin a khung a, tun hnaia ram tana koh Raphinha chuan goal hnih khung belhin Gabriel Barbosa pawhin a khung. Mikhual team tana Luis Suarez goal khung chuan awmzia a nei phak ta lo.

Inkhel dangah Lionel Messi-a'n goal khung lo mah se Lautaro Martinez an awm. Inter Milan striker hian chawlhlawk hma deuhin inkhela goal awmchhun a khung a, an match hnuhnung zawka Uruguay an hneh ṭum pawhin goal a khung tawh.