Barcelona-ah Pedri a cham dawn

Tun hnaia chanchin lawmawm reng reng hriat tur nei lo Barcelona fan-ten chanchin lawmawm hriat tur an nei ve ta a, rawlthar duhawm Pedro Gonzalez 'Pedri' chuan Catalan club-a cham chhunzawm zel turin contract thar a ziak.

Kum 18 mi Pedri hian June 2026 thleng Barcelona-a cham tur hian contract a ziak a, hetih chhunga lei chhuak duh an awm a nih chuan dollar tluklehdingawn khat sen an inhuam a ngaih tur thu ziah tel a ni bawk!

Barcelona hian Pathianni zan dar 12:30-ah league match an khel dawn a, Valencia an mikhual ang - team pahnih hian point 12 ve ve an nei tawh a, match khatin Valencia an khel tam thung.

Hetihlai hian Barca elpui Atletico Madrid leh Real Madrid-in tun kar tawpah league match khelh tur an nei lo a, La Liga club langsar zingah Barca chu inlan tur awmchhun an ni.

Rawlthar duhawm
September 2019 khan Pedri hian Las Palmas aṭanga Catalan club zawm turin Barcelona chu inremna a neihpui a, mahse, July 1, 2020-a Nou Camp pan chauh turin contract an ziak.

Kum 2019-2020 season khan Las Palmas tan Segunda division lamah a khel a, inelna hrang hrangah match 37 khelin goal li a khung a, assist vawi sarih a nei bawk.

Season hmasa ṭan dawn khan Pedri-a'n Barca a pan ta a, kum hnih atan contract ziakin, a man zat hi euro maktaduai nga 'lek' a ni - tunah erawh a duh tan euro tluklehdingawn khat insen huam a ngai ta!

Barcelona-a a season hmasa berah Pedri-a'n match 52 ngawt a khel nghal a, goal li khungin assist vawi ruk a nei a, Copa del Rey nomawi a chawi bawk.

Spain fachuam
Pedri-a'n kum naupangtê ni chungin Barca-a a season hmasa berah hmun pawimawh a chang nghal thei a, Spain coach Luis Enrique-a'n Pedri thiamna a hmuh hmaih lo.

Euro 2020 khel tur squad-ah telh a ni a, Sweden nena an match hmasa berah a inlan nghal. Hetihlai hian kum 18, thla ruk leh ni 18 mi niin European Championship-a Spain tana inlan thei naupang ber record a siam.

Spain-in semifinal an luh theihna tura player pawimawh a ni a, chumi tinghettu chu Young Player of the Tournament-a thlan a ni leh UEFA European Championship Team of the Tournament-a a lang phak kha a ni.

Kum 18 lek ni chungin Spain tan match 10 a khel tling der tawh a, Barcelona tan chuan ani ang playerin Catalan club talbuai kara cham a thlang hi thu lawmawm a tling.

Player rintlak
Pedri hian season hman zawh takah khan Euro a khelh bakah Olympics-ah Spain jersey hain a inlan bawk a, final lut mah se gold medal erawh an hlawh chhuak zo ta lo thung.

Spanish midfielder hian season hmasa khan ram leh club tan inelna hrang hrangah match 74 zet a khel a, season hmasa khan European player zingah ani ang em ema match khel hnem an awm lo!

Pedri hi midfielder thiam bik leh hmuhnawm a nihna piahlamah hliamin a tibuai khat khi Barca tan chuan lawmna tham a tling a, coach tan beiseina nghah ngamna a ni.

Barcelona hian Pedri ber an thlun ngheh takah chuan an player naupang zawkte contract thar an zawrh nual dawn nia sawi a ni a, Ansu Fati, Ronald Araujo leh Gavi te chu contract thar ziak turin an dawr leh dawn niin an sawi.

Pedri telna Barca
Barca-in chanchin lawmawm hriat tur an neih tlem lai takin Pedri an chelh thei a, Spanish midfielder contract thar ziah thu hre sain fan-ten Pathianni zanah an team inkhel an en dawn.

La Liga table-ah Barcelona hi pakuana an ni mek a, Ronald Koeman hoa champion beisei ngam tur chuan tunah insiamṭhat an mamawh tawh - Valencia an ngam lo a nih ngat chuan fans lawmna hian rei a daih lo ang.

Valencia hi an league match hmasa paliah tlawm lo mah se an match hnuhnung paliah an chak zo lo vek thung a, Barca lakah insiamṭhat an tum ve dawn tho - inkhel a hmuhnawm dawn.

Barca-in sum neih loh vang liau liauin, an duh loh Koeman an la ban ngam rih lo a, Dutch coach hian a hlutna tilanga a team tan result a hlawhchhuah a hun tawh - inelna hrang hranga an match hnuhnung parukah vawi khat chiah an chak.