Djokovic-a'n US Open khelh a tum lo?

Novak Djokovic chuan US Open chu an kal dan tur phung an thlak danglam a nih loh chuan atan inlan a harsat tur thu a sawi. Rafael Nadal pawhin New York khawpuia thlawh luh a la chak loh thu a sawi ve tawh bawk.

United States Tennis Association (USTA) chuan August thla tawp aṭang hian Flushing Meadows-ah US Open chu khelh an la tum zel. US hi coronavirus len nasatna hmun a ni a, a bik takin New York khawpui chu hri kai an tam zualna hmun a ni.

USTA ruahman dan chun - ram pawn aṭanga zin lut reng reng, tennis khel tur pawh ni se ni 14 khung hran hmasak tur an ni. Court velah inkaihhruaina dan khirh tak a awm a, mahni duh hun hunah training neih theih a ni dawn lo.

Match an khelh laiin player pakhatin amah ṭawiawm turin mi pakhat bak a hruai lut thei dawn lo bawk. New York-ah an duh duhna hmunah an kal kual thei dawn lo a, tournament khelhna bulhnai hotel-ah player an thleng ang, hmun danga an kal phal a ni dawn lo bawk.

World number 1 Djokovic chuan, "Inkaihhruaina hi player tan zawm harsa lai a tam mah mah. Fimkhur taka thil an kalpui hi chu ka hrethiam a, chutih rualin zalen lo lutuka thil tih chu a nawmna leh hlimawnna a awm dawn chuang lo.

"Player hrang hrang kan inbe ve fo a, tu pawhin a harsat kan ring vek. Tuna ruahmanna an siam anga an kaltlang a nih chuan kei chu ka inkhel lo ang, season hman lai chu September aṭangin ka ṭan ṭha leh dawn tihna a ni," a ti.

May thla a khelh tur French Open chu September thla chawhnu lamah an khel dawn a, Serbian tlangval hian clay court inelna lianah chuan tel a tum thu a sawi thung - Paris khawpuiah hian a hmuna entu awm chunga khelh an beisei mek.

Hripui leng vangin Wimbledon chu kum 1945 hnua a vawi khat nan an ṭhulh fel tawh. USTA chuan tun kara an hman lo a nih pawhin, kar leh lamah chuan kumina inelna an neih tur chungchang hi thutlukna an siamfel tura ngaih a ni.