Raducanu a inhnukdawk

US Open champion Emma Raducanu chu kar leha khelh tur Kremlin Cup-ah a inlan dawn lo. A tirah chuan Moscow khawpuia inelna neih turah hian inlan a tum, mahse chawlh a mamawh avangin a inhnukdawk leh ta zawk.

Kum 18 mi Raducanu hian US Open nomawi a chawi hnuah tournament pakhat chiah a la khel, a match hmasa berah a chak lo zui. Indian Wells Masters-ah Aliaksandra Sasnovich hneh loin a tla nghal.

British tleirawl Raducanu chuan, "A tam thei ang inkhelh duh mah ila Moscow-ah ka zin thei dawn lo. Russia lama min ṭantute chungah ngaihdam ka dil, engtik niah emaw chuan kan la inhmu ngei ang.

"Tawnhriat ka nei chho ve zel a, mahni tum leh duh ang vekin a awm theih loh tih pawh ka zir chhuak. Keimah chauh ni loin team lam nen a ṭha ber tur kan ngaihtuah a ngai," a ti. Season tawp hmain Romania leh Austria-ah erawh inkhelh ngei a tum.