Semifinal-ah Jabeur a lut

Ons Jabeur chuan Estonian Anett Kontaveit hnehin Indian Wells Masters semifinal a lut a, karleha world rankimg chhuak tharah chuan a sang zual 10 zingah a tel ang - Tunisian nula hi Arab mi zingah top 10 kai thei hmasa ber a ni dawn.

Nimin zing quarterfinal inkhelah world number 14 Jabeur hian 7-5, 6-3 in hnehna a chang, final lut tur chuan Paula Badosa a hneh leh a ngai dawn. Spanish nula Badosa hian inkhel dangah Angelique Kerber chu 6-4, 7-5 in a lo hneh ve thung.

Jabeur chuan, "Hnehna chan hi a lawmawm, ka lawmna belhchhah tu chu world number 10 huangah ka awm ve thei dawn tih kha a ni bawk. Player zawng zawngin ranking sang nih chu kan châk vek," tiin a sawi.

Indian Wells Masters khelh laia semifinal luh pawh Jabeur tan chanchin lawmawm a tling. Grand Slam dawta inelna sangah tun hmain semifinal a la lut ngai lo, a thlen chin apiang hi record a ni zel.

Mipa singles lamah Cameron Norrie chuan Diego Schwartzman 6-0, 6-2 a hnehin semifinal a inhlangkai a, inkhel dangah Grigor Dimitrov pawhin seeded pariatna Hubert Hurkacz chu 3-6, 6-4, 7-6 (2) in a hneh ve bawk.