Juventus mualah AS Roma

Tun hma deuh ang kha chu ni se - Juventus leh AS Roma an inkhel dawn a nih chuan Old Lady chu chak tura rinkai zawk an ni. Tun ṭumah erawh an inkhelhna tur hi Allianz Stadium ni mah se, manager Jose Mourinho vangin Roma hi dah hniam ngawt theih an ni bik dawn lo.

Pathianni zan dar 12:15-ah Juve hian Roma an mikhual dawn. Serie A match sarih an khelh tawh chinah chuan Roma an la chungnung zawk, point 15 hmuin palina dinhmun an luah; Juve erawhin point 11 chauh an la nei thung.

Mourinho-a'n Roma a dinthar leh mek a, player thar lei khawm nghek lem lo mah se a neihsa a siamṭha leh mek. Chelsea aṭanga a lakluh Tammy Abraham pawh a chher hriam tawh hle - mahse Abraham hi England tana a feh chhuahna lamah a inhliam a, a dinhmun a chiang rih lo.

Kum 24 mi Abraham hian Roma tan match 10 a khelh aṭangin goal li bakah assist vawi hnih a nei tawh, goal bar vawi ruk ngawt a tih per tawh bawk - ani hi a inlan thei lo a nih chuan chhanna nasa tak a ni dawn. Juve lam tan erawh thawk huaina tham a ni thung ang.

Juventus pawh hliamin a tibuai ve tho. Arthur Melo leh Moise Kean te lo kir tawh mah se Paulo Dybala leh Alvaro Morata ten training pangngai an la zawm lo a, hri leng kai vangin Adrien Rabiot a la inlan thei dawn lo bawk - an ṭhat dan berin an khel thei dawn bik lo.

Massimiliano Allegri-a'n season bul ṭan fuh pui lo mah se a naute a siamrem mek zel a, tun ṭumah hian an chak a nih chuan beiseina an nei sang leh tawh khawp ang - an chak lo a nih erawh chuan a sang pali zinga tel tur pawhin hna a hautak chho khawp ang.

Tunkar tawp inkhel tur dangah zanin dar 8:30-a Lazio leh Inter Milan inhmachhawn tur hian ngaihven a hlawh ang. Champion lai Inter hi manager thar Simone Inzaghi hnuaiah an indin nghet leh tawh viau. Lazio pawh Maurizio Sarri-a'n a sang zual pali zinga tel phak pui ngei a tum avangin chak an tum dawn.