Lewandowski dahsangtu Nagelsmann

Bayern Munich manager Julian Nagelsmann chuan an striker Robert Lewandowski a dah sang hle a, mimal chawimawina sang Ballon d'Or pawh dawng awm ber a nih thu a sawi chhuak.

Season hmasa khan hripui leng vangin Ballon d'Or an sem lo, dawng tura rinkai Lewandowski ui puitu an tam viau. Mahse, sem ta pawh ni se a dawng ngei ang tih a chiang chuang lo, a dawng tur hi vote hmanga thlan ṭhin a ni.

Nagelsmann chuan, "Robert hian Ballon d'Or a phu berah ka ngai, a chhan chu tun hnai kan thlir a nih chuan ani tluka khel ṭha tluang hi an awm lo, club tan a thawh hlawk em em a, ram tan pawh mi pawimawh ber a ni bawk.

"Hliam nei loin a khel thei reng a, a taksa a invawn bakah training a nei ṭha tih a chiang. Khelmual chhung leh pawnah player dangte tana entawn tlak a ni," tiin a player a dahsang hle a, kuminah a champion pui thei dawn em tih chu fiahin a awm ang.

Poland international hian Bundesliga match sarih a khelh aṭangin goal sarih a khung leh tawh a, a club hi table hmahruaitu a nihpui mek. Borussia Dortmund hmatawng Erling Haaland nen an goal khung zat a in ang.

German champion Bayern hian Pathianni zan dar 7:00 hian Bayer Leverkusen an lenchilh dawn. Club pahnih hi point 16 hmu ve ve an ni a, league hmahruaitu zawk nih inchuhna a nih avangin inkhel a hmuhnawm dawn.

Hliam vangin Kingsley Coman leh Corentin Tolisso te dinhmun a chiang lo. French defender Benjamin Pavard chu hrem vangin a inlan thei dawn lo bawk - international match khela zin chhuak midang zingah hliam langsar an awm lem lo.