Goodison Park-ah Liverpool champion thei

Liverpool-in Premier League nomawi an chawi theihna tur hmasa ber inkhel Merseyside derby chu Goodison Park-ah neih remtih a ni a, Reds fans tan chuan an ṭhenawm club khelmuala nomawi chawi hi a châkawm khawp ang. 

Reds hian Premier League-ah point 25-in hma an hruai fal mek a, Arsenal-in June 17 zana Manchester City an hneh chuan June 21 zana Everton an lenchilh hunah hnehna an chan chuan an champion thei dawn.

Venhimna lama thil thleng theite ngaihtuahin Merseyside derby hi neutral venue-a khelh mai rawtna a awm a, hei bakah hian Liverpool an champion theihna apiang inkhel chu neutral venue-a khelh mai rawtna a awm. 

Mahse, nimin khan Liverpool City Council safety advisory group chuan an khaw club Liverpool leh Everton chu an muala an inkhel thlen an phalsak a, Reds fans tan thu hriat nuam a ni.