Ligue 1: Relegation awm dawn lo?

France rama court sang ber Conseil d'État (Council of State) chuan Ligue 1 tihtawpna chu a pawmsak a, mahse league mawngphah lama awm Amiens leh Toulouse relegate-na tur erawh a dang thung. 

Council of State chuan, "Tun season atana Ligue 1 tihtawp a nihna chu pawm a ni a, hetihrual hian relegation awm tura a lo rel tawh erawh tihtawp lailawk a ni," an ti. 

France rorelna sang chuan French Football League (LFP) chu an ram football league sang lam pahnih kalphung chu zirchiang leh turin a hriattir a, Amiens leh Toulouse dinhmun hi a la danglam leh thei tihna a ni. 

Hetihrual hian court-in relegation awm tur a tihtawp lailawk avang hian LFP lam hian court kalh zawnga thutlukna thar a siam erawh a rinawm chiah tawh lo a, Amines leh Toulouse fan-te chu an lawm khawp ang. 

April thla tawp lam khan France sorkar chuan an ram chhunga infiamna awm zawng zawng chu Covid-19 vangin kalpui chhunzawm zel chiah a ngai lo a, September thleng infiamna lam kalpui theih loh turin a titawp. 

He thutlukna hian Ligue 1 lam pawh nghawng nghalin season tihtawp a ni a, table chung bera point 12 ngawta hma hruai faltu Paris St-Germain chu champion-ah puan an ni. 

Ligue 1 hian season khaikhawmna table atan points per game chu an hmang a, table mawng lama awm sa Amiens leh Toulouse chu a mawng lam pahnihah tho awmin relegate tir an ni. 

Season dang ang chu ni se table-a 18-na Nimes chu relegation playoff khel tur an ni a, mahse Ligue 1 chuan hei erawh hrethiamin playoff khelh ngai loa Ligue 1 khelh chhunzawm turin an ti. 

Match 10 tehmeuh khelh tur la nei Amiens leh Toulouse-in an relegate tur hi an hrethiam thei lo a, an hmabak match 10 hi khelh chhunzawm ta se French top flight league-a cham zel turin chance an neiah an inngai. 

Amiens leh Toulouse hian an lungawi lohna chu court lamah an kalpui vat a, rorelna sang lamin an duh ang takin ro an relsak - Ligue 1 hi season tharah eng angin nge an kal ang? tih zawhna a lo piang nghal. 

Ligue 1 tihtawp a nih khan Ligue 2 club Lorient leh Lens chu season thara league sang ber khel tura kaisan tir an ni a, hei hi LFP tan tihtawp leh ngawt chu a remchang lo tura ngaih a ni. 

Chumi a nih chuan season thara club 22-in Ligue 1 an khelh maina 'chance' hi a sang hle - club 22 hi an awm a nih chuan automatic-a relegate tur hi paliah tihsan a ni thung dawn tihna a ni ang. 

Division hniam lama relegate duh loin court lamah Amiens leh Toulouse an zualko a, an beisei ang ngeia court-in rorelsakin season tharah Ligue 1 an la khelh chhunzawm ngei dawn niin a lang.

European football an khelh dawn loh avanga lungawi lo Lyon pawh court-ah hian an zualko ve tho a, anni ngenna erawh Europe-a ram dang ang thoa Ligue 1 khelh chhunzawm leh a ni. 

Mahse, court chuan Lyon dilna erawh a pawmsak lo a, Ligue 1 tihtawp chu an thlawp. Lyon hi table-ah pasarihna an ni hram a, Europa League an khel thei lo chiah chiah. 

Lyon-in pangana Nice leh parukna Reims an phak lohna hi khelh zat inangah point khat chauh a ni a, European football an khelh theih dawn loh avanga an lungawi lo hi a awm hle. 

Lyon leh Ligue 1 lam hi court rorelnaah an lungawi lo a nih chuan thutlukna hi ngaihtuah nawn turin an ngen leh thei a, hetihrual hian heti zawnga hma an lak nawn erawh a rinawm chiah lo. 

Chutihrual chuan French football-a Cup inelna erawh khelh chhunzawm theih beisei a ni thung a, Paris Saint-Germain, Saint-Etienne leh Lyon-te chuan training an nei leh ṭan tawh. 

Paris Saint-Germain hi Coupe de France final-a Saint-Étienne nena inhmachhawn tur an ni a, Coupe de la Ligue final-ah Lyon nena inhmachhawn tur an ni bawk. 

Khawthlang media ṭhenkhatin an tarlan dan chuan French Cup leh League Cup final hi July emaw August-ah  khelh tum a ni a, league champion PSG tan tualchhung football-ah nomawi dang pahnih a la beisei theih tihna a ni.