Apuia telna India an champion
SAFF Championship-ah beisei angin bul ṭan lo mah se India-in mawi takin a tawp an khar a, an champion. Mizo tlangval Lalengmawia telna team hian final-ah Nepal chu 3-0 ngawtin an sawp.
Blue Tigers tan Sunil Chhetri, Suresh Singh Wangjam leh Sahal Abdul Samad ten goal khat ṭheuh an khung a, Nepal lamin a chhanletna tur an neih loh avangin India an champion.
SAFF Championship-a India an champion vawi riatna a ni a, Vaivakawn tlangval Apuia'n Blue Tigers tana tournament a khelh hmasak berah champion nomawi a chawi nghal.
SAFF ṭantirha sawisel hlawh tak Igor Stimac-a'n a tawp lamah thutlukna siam fuhin India a champion pui a, Croatian manager sawiselna chil per pawh a hul hmain a faknain a zui leh ta zawk.
Stimac-a thutlukna
India-in an match hmasa pahniha hnehna an chan zawh loh hnuin Stimac-a'n match thumnaah player a siksawi a, a hmaa bul ṭan miah lo Apuia pawh match thumnaa bul ṭan thar zingah a tel.
Stimac-a'n thutlukna a siam fuh a, player thlak danglam miah loin match hnuhnung pahnihah India an chak a, final hial an lut.
Croatian coach-in final-ah pawh thutlukna a thlak danglam tam lo. Hrem tawk Subhasish Bose aiah tlarhnung laia ding turin Chinglensana Singh a lut a, inhliam Brandon Fernandes aiah Anirudh Thapa a lut bawk.
Apuia pawhin dan pangngaiin bul a ṭan a, a tawi zawnga sawi chuan Stimac-a'n loh theih loh vanga siksawi ngai tih lohah chuan player a thlak lo a, India ṭhat dan ber a hre tawh - chu chu Apuia telin a ni!
A tirin...
National Football Stadium, Malé-a inkhelah India-in bul an ṭan ṭha a, Nepal goalkeeper Kiran Limbu-a'n minute lina aṭangin hna a nei nghal.
Mohammad Yasir-a long range shot chu Limbu hian a dang a, a per lehlam chu Thapa chuan pet hman mah se RoundGlass Punjab keeper hlui Limbu-a'n a dang hman.
Nepal-in minute 16-naah chance nei ve mah se an player chhuanvawr Rohit Chand chuan a hun ṭha neih hi a chhawr thei lo a, India an vannei a, goal a lut lo zel.
India captain Sunil Chhetri-a'n chawlhlawk hmaa a hming chherna remchang a nei zui a, mahse, Pritam Kotal hnen aṭanga a ball hmuh ṭha tak hi goal-ah a chantir thei lo.
A tawpah...
Goal awm loin chawlhlawk hman a ni a, second half ṭan aṭanga minute lina lekah India-in goal an khung ta nge nge thung - mual sir aṭanga Kotal-a cross chu Chhetr-i-a'n goal-ah a chantir a, a hlah nawn tawh lo.
Minute khat a liam a, India bawk an hmuhnawm. Suresh Singh chuan India tan innghahna tlak a ni tawh tih pholangin an goal hnihna an khung a, chak tur a chiang tawhah a ngaih theih.
Hun pek belh a ni a, tun inelnaa khel khat ve tak Sahal a rawn lang - ani hian India chak nemnghehna goal a rawn khung a, Nepal tan tho leh turin hun a awm tawh lo.
Lalengmawia chuan, "Ka mimal ngaihdan min zawt a nih chuan Stimac-a'n match hmasa pahnihah khan player a thlang fuh tawk lo a, result-ah pawh a chiang. Player a siksawi hnu kha chuan goal pawh kan khung a, a lawmawm duh hle," tiin Stimac-a player thlak chu an ṭhat phah niin Vanglaini a hrilh.
A hming Chhetri
Kum 37 mi a ni tawh a, India tan Sunil Chhetri a la hmuhnawm zel - final-ah goal a khung a, tun inelnaah goal nga khungin ani aia khung hnem an awm lo.
India-in tun inelnaah goal riat an khung a, heng zinga goal thum chiah hi player dang khung tihna a ni a, Chhetri tel lo chuan Blue Tigers an ropui tak tak thei lo tih a lang.
Chhetri-a'n ram tan match 125 a khelhah goal 80 a khung tling ta bawk a, international football-a goal khung hnem lamah Lionel Messi a tluk ta chiah.
Ram tana la inkhel mek zingah Cristiano Ronaldo (115 goals) chiah chu Chhetri-a phak loh a ni a, a pumpuiah palina a la ni phak - a nep lo hle.
Vanglaini Biangbiakna
SAFF Championship-a bul ka ṭan ni aṭangin kan chak vek a, kan khelh dan leh result a ṭha a nih chuan tournament chu a nuam a ni mai. Senior team tana ka vawi khat tournament khelhnaah kan champion nghal a, ka lawm takzet. Goal hnihna kan khung kha chuan champion angah ka inngai tawh a, min champion tir avangin Pathian hnenah lawmthu ka sawi nghal a ni. Ka kal lehzelna turah India leh Mizote tihmingṭhatu ka nih zel theih nan min lo ṭawiawm leh ṭawngṭaipui zel turin Mizo mipuite ka sawm a, engtiklai pawha min thlawptute leh a bik takin ka chhungte chungah thinlung takin lawmthu ka sawi e. - Lalengmawia (Apuia), India midfielder
SAFF Congress-ah MFA Honorary Secretary
Nimin khan Maldives-ah SAFF executive meeting leh Congress neih a ni a, India ram aiawhin Mizoram Football Association honorary secretary Lalnghinglova Hmar a tel. SAFF Congress-a palaite hian SAFF Championship final-a India-in Nepal an hneh chu a hmunah an thlir bawk.
MFA honorary secretary Tetea Hmar chuan, "SAFF Congress-ah ka tel thei hi ka lawm a, AIFF aiawh ka ni a, chutih rualin AIFF-a ka awm chhan MFA leh DFA vang a ni tih ka hria a, ka lawm hle. "Maldives ah FIFA Development Officer kan ṭhianpa Prince Rufus a lo kal ve bawk a, ani nen hian Maldives lama FIFA Forward Project hnuaia thil hrang hrang kan tlawh thei a, a lawmawmin inzirna tur pawh kan nei nual dâwn a ni," tiin Mizoram football hmasawnna tura hna thawktu MFA leh DFA te zar a nih thu a sawi.
SAFF C'ship final chungchang sawi zuiin Tetea Hmar chuan, "SAFF Championship final kan en thei a, Mizo player Apuia a khel ṭhain a chhuanawm. Chutih rualin Mizo player ṭhahnem zawk India Senior team-a an luh leh theihna tura hma kan lak zel a ṭul zia ka zuk hmù. A hmuna awmin ṭan a nâ duh hle," tiin India squad-a Lalengmawia chauh a awm chu a bei thama a hriat thu a sawi. SAFF Congress-a a tel hma hian Tetea Hmar hi AIFF aiawhin FIFA Congress leh Asian Football Confederation Congress-ah te a tel tawh a, India aiawha tel theihna inkhawmpui lianah a tel kim a ni.
Champion kalkawng
Group Stage
October 4, Thawhṭanni Zan
Bangladesh 1 - 1 India
BAN: Yeasin Arafat 74'
IND: Sunil Chhetri 26'
October 7, Ningani Zan
India 0 - 0 Sri Lanka
October 10, Pathianni
Nepal 0 - 1 India
IND: Sunil Chhetri 82'
October 13, Nilaini
India 3 - 1 Maldives
IND: Manvir Singh 33'; Sunil Chhetri 62', 71'
MAL: Ali Ashfaq 45' (P)
*Team panga inkhel kualah a sang ber niin final an lut a, match li aṭangin point riat an hmu.
October 16, Inrinni - Final
India 3 - 0 Nepal
IND: Sunil Chhetri 49'; Suresh Singh Wangjam 50'; Sahal Abdul Samad 90+1'