Chennai Super Kings an champion

Mahendra Singh Dhoni kaihhruai Chennai Super Kings chuan Zirtawpni zan khan Indian Premier League final-ah Kolkata Knight Riders chu 27 runs a hnehin an champion.

Dubai International Stadium-ah CSK-in bat hmasain 192/3 runs an siam a, KKR-in 165/9 chauhin an chhanglet. Chennai hian IPL vawi 14 khelh tawhah vawi li an champion.

Du Plessis a vul
Ṭhumvawrah Knight Riders an vannei a, rin lawk angin vawm hmasak an thlang. CSK an bat hmasak avangin an dinhmun ṭha lo zawkin lang mah se opener pahnih Faf du Plessis (86) leh Ruturaj Gaikwad (32) te an che ṭha a, an pahnih inkawp hian 61 runs an siam hman.

Robin Uthappa (31) leh Moeen Ali (37) ten opener te an rawn thlawp ṭha a, Chennai hian wicket thum chauh hlohin 192 runs an siam. Run 86 siamtu Du Plessis zarah Chennai dinhmun a ṭha hle.

Final hmuhnawm
Target a san hian chetsual a awl ṭhin a, Kolkata tan bual ṭantu Shubman Gill (51) leh Venkatesh Iyer (50) ten bul an ṭha takzet a, 91 runs an siam hman bakah an strike rate a ṭha.

Over 10 zawhah KKR chu chak thei dinhmunah an ding a, mahse Iyer-a six runs vuak tur chu Ravindra Jadeja-a'n ṭha zetin a man.

KKR-in chak tura runs an mamawh tam avangin risk an la a, CSK fielding a ṭhat avangin batsman an thi phuk phuk. Dhoni hote awlsam taka chak turah an ngaih theih.

Mahse, over 18-naah Shivam Maxi-a'n four a vuak hnuah six vawi hnih a rawn vaw nghal a, Dwayne Bravo vawmah 18 runs tehmeuh an siam avangin KKR-in beiseina thar an nei.

Pressure sangah bowler Shar-dul Thakur a rawn talbuai a, 17 runs a rawn pe ve bawk. Over tawp berah KKR tan 31 runs siam a la ngaih avangin chak a beiseiawm lo a, chutichung chuan CSK an hlauthawng.

Captain cool Dhoni-a'n Bravo chungah rinna a nghat nawn a, Windies bowler hian 3 runs chauh a pek bakah Shivam Mavi a vawm hlum. KKR-in 165/9 runs an siam a, 27 runs-in CSK an chak.

Chuai thei lo Dhoni
Chennai Super Kings hian IPL vawi 14 khelh tawhah vawi kua final an lut thei a, hei hian captain Dhoni ropui zia a pholang.

Kum 40 mi Dhoni hian champion zawhah chawlh mai a la tum loh thu a sawi lang. Dhoni chuan, "Final hi chu a danglam vek a, statistics kan thlir chuan nghelnghet ber. Knockout-ah kan che ṭha. Tun dinhmun kan thlen theih nan fan-te an pawimawh a, Chennai a khel ang mai kan ni," tiin a sawi.

CSK hruaitu pakhat chuan, "IPL dan angin kan chelh tur kan thlan huna a hmasa ber tur chu Dhoni a ni. Kan chelh zat tur kan la tichiang thei lo a, mahse Dhoni hi chu kan chelh dawn. Kan team hruai tur hian captain hi kan mamawh a ni," tiin Dhoni an dahsan thu a sawi.

Tun ṭum IPL-ah hian Chennai hi league round-ah pahnihna an ni a, qualifier 1-ah pakhatna Delhi Capitals chu wicket liin an hneh. Final-ah vawi hnih champion tawh Kolkata Knight Riders an hneh a, vaw hmasa zawk chunga chak an nih avangin an hnehna chan hi a hlu lehzual.