Liverpool-in Watford lakah zahngai lo

Coach thar Claudio Ranieri enkawlna hnuaiah Watford-in beiseina nen Liverpool lo mikhual mah se Reds-in mikhual awm dan mawi an lantir duh lo a, 5-0 ngawtin an sawp.

Liverpool tan Roberto Firmino chuan hattrick a siam a, international break-a Brazil tana koh loh striker hian Brazil coach Tite-a tan ngaihtuahna sen ṭhat a ṭul tih a pholang.

Firmino-a goal hmasa pahnih chu James Milner-a siamsak leh Watford keeper Ben Foster-a ball dan per hnai set sawt aṭanga a khung a ni a, Neco Williams-a siamsak khung tur a tlan luh dan erawh striker thluak hmang ṭhin chezia a ni.

Diogo Jota awm hnuah Brazilian forward hian tun hma angin lawm hlawh tawk lo mah se a la thiam reng tih erawh a lang a, tun season-ah match sarih khelin goal ruk a khungna a ni - assist vawi khat a nei bawk.

Firmino hattrick karah Mohamed Salah hming a langsar lo thei lo - Egyptian forward hian minute riatna lekah Sadio Mane goal khung tur a siamsak a, Senegalese forward tana a 'assist' hi a pui rem rem hle.

Chu chauh a ni lo - minute 54-naah goal a khung ve bawk a, Watford defender rual a bumthluk hnuah goal ropui bik a khung.

Kum 29 mi Salah hian tun season inelna hrang hrangah match 10 khelin goal 10 a khung ta a, assist vawi li a nei bawk. Salah hian Premier League-ah goal 104 a khung ta a, African player zinga Premier League-a goal khung tam ber Didier Drogba a nihrual.

Chelse legend Drogba hian Premier League goal 104 khung turin match 254 a mamawh a, Salah hian match 166 chiah a mamawh thung - match 88-in goal 104 khung turin a mamawh tlem zawk tihna a ni!

Kum 29 mi Mané-a'n penalty tel loa Premier League-a goal 100 khung tling thei pathum zingah a hming a ziak kai ta a, Liverpool striker hlui Emile Heskey (110 goals) leh Tottenham Hotspur striker hlui Les Ferdinand (149) te nen huang khatah an awm.

Mane hian goal 100 khung tur hian match 237 a mamawh thung a, tun season inelna hrang hrangah match sawm khelin goal ruk a khung ta.

Liverpool boss Jurgen Klopp chuan, "Salah hi top player a ni a, a aia ṭha tu nge awm? A khel ṭha takzet a, a assist a ropui a, a goal khung a nalh leh em em bawk.

"Messi leh Ronaldo ten football khawvela an hnathawh hi sawi nawn fo ngai pawh a ni lo. Mahse, tun dinhmunah chuan Salah hi khawvela ṭha ber a ni," a ti.

Reds hian Thawhlehni zan dar 12:30-ah Champions League group stage match khel turin Atletico Madrid an lenchilh zui dawn a, group B-a match hnih an khelh tawhah an la chak ve ve.