Solskjaer hote an mualpho chhunzawm

Leicester City-in Inrinni zan khan Manchester United chu 4-2 in an hneh a, Cristiano Ronaldo leh player langsar dang kawltu Ole Gunnar Solskjaer-a'n tun hnaiah result ṭha a neih loh avangin a hmalam hun chungchangin sawizui a hlawh hle.

King Power Stadium-a inkhelah Man United-in Mason Greenwood hmangin khung hmasa mah se Youri Tielemens leh Caglar Soyuncu te goal hmangin Foxes-in an lehthal. Substitute Marcus Rashford-a'n siphurh hi sut leh mah se minute khat pawh ral hmain Jamie Vardy-a'n hmahruaina goal a khung a, injury time-ah substitute Patson Daka-a'n chak nemnghehna goal a khung.

Goal ropui leh tihsual
Man United-in league match hnuhnung pahnihah point khat chauh an hmuh avangin chak ngei tumin Foxes a hmachhawn a, international break-ah an player pawimawhte an chet ṭhat avangin beisei pawh an nei sang.

Kum 20 mi Greenwood-a'n goal hmahruai a khung a, minute 19-naah mual dinglam aṭanga la chhoin kawh zetin a ke veilamin a pet goal. Man United rawlthar hian player ṭha bik a nihzia a pholang a, Ronaldo te nen mual khata an khel chungin a hun leh hun loah pawh Greenwood hian goal-ah a pet mai zel.

Man United-in inkhel an thunun chho a, amaherawhchu Raphael Varane a awm loh avangin Solskjaer-a'n Victor Lindelof kawppui turin Harry Maguire chu 100% fitness nei loin a luhtirah a ngaih theih.

Foxes-in United captain Maguire tihsual an hmang ṭangkai a, Belgian midfielder Tielemens chuan minute 31-naah goal ropui bik a khung a, keeper David de Gea-a'n goal-a ball lut lai a en liam. Man United-in goal an chhuahnaah Maguire hi a chesual ringawt lo a, awlsam taka tih dik theih tur a tihsual vanga Leicester-in ball an chan phahna a awm bawk.

Mualphona chu
King Power Stadium-ah Ronaldo a reh a, Solskjaer-a'n awmze neiin substitution a siam lo. Player langsar khel ṭha lo Ronaldo leh Pogba te an khelh tluan laiin Jadon Sancho, Nemanja Matic leh Greenwood te la chhuakin Rashford, Jesse Lingard leh Scott McTominay te an lut.

Norwegian manager hian khelh dan mil ni loin player hming ang zawngin a thlak ni berin a lang. Man United tlarhnung vawi tam a nghing a, De Gea che ṭha mah se keeper-in tih theih chin a nei. Minute 78-naah Soyuncu-a'n hnai tak aṭangin hmahruaina goal a khung.

Inhliam vanga season bul khel thei lo Rashford-a'n tun season-a a inlan hmasak berah goal a rawn khung ve zui a, minute 82-naah 2-2 a nih tak avangin hun tawp danah goal khung thiam Man United-in beiseina thar an neih phah.

Mahse, minute khat em pawh a ral hmain Vardy-a'n ṭha zetin hmahruaina goal a volley lut. Man United-in tho chhuak turin tha an nei tawh lo a, injury time-ah Foxes tan Daka-a'n a phu angin a khung ve bawk.

Engtin zel?
Manchester Unied hian Atalanta, Liverpool, Tottenham, Atalanta leh Manchester City te an hmachhawn zui dawn a, Foxes laka an khelh dan thlir chuan an hmabak a thim hle.

Kum 48 mi Solskjaer chuan, "Kan khel ṭha lo a, khatiang anga khelh kha chuan khualmuala hneh loh nei loa kan kal tluang record kha chhunzawm a rem lo. Maguire kha ka thlan a ni a, a fuh lo a nih chuan mawhphurtu ka ni.

"Player ṭha ka kawl. Fred leh Edinson Cavani te an awm lo chungin chhuanlam siam ka tum lo, ka kawlte kha an ṭha tawk. Foxes nen khan De Gea kha kan player ṭha ber a ni a, mahse goal li kan chhuah. Chetsual chang a awm tur a ni a, mah se kan tho chhuak leh tur a ni," tiin an khelh ṭhat loh thu leh mawphurtu a nih thu a sawi.

Social media lamah chuan #OleOut tih thawm a ri ring leh ṭan a, mahse Man United thuneitu lam chuan July 2021 khan kum 2024 thleng atan contract thar an ziahpui. Tun hnaiah Man United khel an khel ṭha lo a, chutichung chuan Solskjaer hi ban tumna a la awm rih lo.