Mamon-a'n lawmman a sem

Indian Premier League vawi 14-na chu Zirtawpni zan khan Dubai-ah zawhfel a ni a, Chennai Super Kings chuan Kolkata Knight Riders hnehin an champion.

CSK batsman Ruturaj Gaikwad chuan 635 runs a siam a, chawhrualin 45.35 runs siamin Orange Cap chawimawina dawng. Royal Challengers bowler Harshal Patel chuan wicket 32 lain Purple Cap chawimawina a dawng bawk.

Cricket Association of Mizoram secretary Mamon Majumdar chuan mimal chawimawina ngaihhlut pahnih Orange Cap leh Purple Cap chawimawina hi a hlan. Mamon hi IPL Governing Council pali zinga pakhat a ni a, CAM secretary hian India ram cricket-a thuneitu sang ber BCCI-ah hmun pawimawh a chang pha a ni.

Nimin khan T20 Cricket World Cup ṭan a ni a, CAM secretary Mamon hi sawm a nih angin Oman leh Papua New Guinea inkhel chu a hmunah a en.