Mendy-a'n Chelsea hma a hruaipui zel

Premier League hmahruaitu chu Chelsea an ni a, English top flight league-a hma an hruai mek theih chhanah lawmthu hrilh tur an nei a nih chuan Edouard Mendy a ni.

Blues hian Pathianni zan khan khualmualah Brentford chu 1-0 in an hneh hram a, Chelsea tan goalkeeper Mendy chet ropui zan ni lo se point thum an hawn kherin a rinawm loh.

London club tan Ben Chilwell chuan goal awmchhun hi a khung a, English defender chuan, "Minute 20 tawp lam kha chu hremhmun ang mai a ni a, mahse, kan ṭang tlang thei a ni," a ti a, hei hian inkhel awmzia thui takin a hrilhfiah.

Harhna chang
Thomas Tuchel enkawlna hnuaiah Marcos Alonso-a'n rin loh takin hmun pawimawh a chang a, German coach hnuaia fullback ṭangkaina leh Alonso-a khelh dan a inmil ṭhin hle.

Hetiang boruak karah hian pound maktaduai 50 man Chilwell a thamral mai dawn niin a lang hman. Mahse, Brentford lakah goal awmchhun a rawn khung leh ta a, Tuchel-a system-ah a ṭangkai thei tih a pholang.

Chilwell hian international break hma khan Southampton laka 3-1 a an chak ṭumin goal a khung a, England tan Andorra lakah a khung a, Brentford lakah a khung leh ta - hei chauh ni loin tlarhnung a pui ṭha a, Chelsea-ah hmun pawimawh a chang zel dawn niin a lang.

Mendy, kan lawm e!
Chelsea-in ram tana fehchhuah vangin Thiago Silva an chhawr thei lo a, Germany international Antonio Rudiger a inhliam bawk avangin tlarhnungin duhthu a sam lo.

Tlarhnung laiah kum 22 mi, a vawi khat nana league-a inlan Malang Sarr, tawnhriat nei tlem Trevoh Chalobah leh Andreas Christensen te an ding ho a, Brentford goal nawr na tak karah Blues tlarhnung an nghing fo.

Chelsea goal-ah Mendy ding lo se inkhel thawnthu danglam thei a ni - huaisen taka save vawi hnih a nei a, Christian Norgaard hun ṭha chu mawi zetin a dang bawk. Brentford forward Bryan Mbeumo chuan vawi hnih woodwork a tih per a, Chalobah chuan goal line aṭanga petchhuah a nei bawk.

Thukhawchang
Chelsea boss Tuchel chuan, "Minute tawp lam 20 kha chu knockout match ang mai a ni a, huaisen takin an rawn bei a ni. Brentford an phur laklawh a, player pakhata tlem zawk ni chunga inkhel ang mai kan ni.

"Minute 65-70 vel thlenga kan khelh danah kha chuan ka lawm a, goal pawh a aia tam zawk khung tur kan ni. Mahse, Brentford khan zah an phu," a ti.

Goal khungtu Chilwell chuan, "Lawmthu sawina tur Mendy kan nei a, a khel ṭha takzet a ni," a ti a, Brentford coach Thomas Frank chuan, "Minute 90 inkhel in en chuan chak phu zawk kan ni," tiin an vanduai thu a sawi ve bawk.