Lazio lakah Inter Milan an tlawm

Goal an phurh hmasak hnuah Lazio chuan anmahni aia team ṭha zawk Inter Milan 3-1 in an lehthal a, champion lai Inter tan Serie A nomawi humhim a harsa tawh dawn - an chungah Napoli leh AC Milan an awm.

Inrinni zan inkhel dangah AC Milan chuan an mikhual Hellas Verona 3-2 in an hneh, Milan hian match riat an khelh aṭanga point 22 hmuin hma an hruai; match sarih khelha chak vek Napoli-in an khelh hmabaka hnehna an chan chuan an tlan pel leh ang.

Thawhlehna
Player leh coach a nih hnua season 20 chuang hun a hman tawhna Stadio Olimpico-ah Simone Inzaghi a kir a, tun ṭumah chuan a club hmangaih hi hneh tumin Inter Milan a kaihruai, a club hlui aṭanga a player chhawm tel Joaquin Correa a hruai bawk.

Inkhel ṭan tirah Edin Dzeko chuan goal bar hrulah a tauh liam nghal puat a, minute 12-naah Nicolo Barella-a penalty hlawh chhuah chu Ivan Perisic-a'n khungin mikhual lamin hma an hruai.

Chawlhlawk hmain goal dang a lut zui lo, second half minute 64-naah captain Ciro Immobile chuan penalty aṭang bawkin an si phurh a sut a, hun tawp hma minute 10 chauh awm tawhah Felipe Anderson leh Sergej Milinkovic-Savic ten chak an nemnghet.

Inter hian season hmasa khan point 12 ngawta sang fal chungin league nomawi an chawi. Tunah erawh an hmelma leh elpui ni bawk Milan nen an inkarah point nga a awm der tawh a, an hmabak a hautak dawn tawh hle.

Kan vanduai
Chak lo mah se Simone Inzaghi chuan a naute an khelh ṭhat thu a sawi a, chutih rualin tlarhnung phui lo chu pawi a ti hle. Italian manager chuan, "Tun hnaia kan match khelh hoah chuan kan tih ṭhat ber ṭum a ni hial mai thei.

"Mahse, vanduai thlak takin penalty kan chawi a, kha khan thil a thlak danglam ta vek a ni," tiin a sawi a, a striker Lautaro Martinez-a'n hun tawp lama remchang a neih a chhawr ṭangkai thei lo chu pawi a tih thu a sawi bawk.

Argentina international Martinez hian Zirtawpni zing khan an ram tan a khel a, South America aṭangin Europe-ah a thlawk let nghal vang vang a, Inrinni zanah match a khel leh nghal! Inkhel bul ṭantu zingah tel lo mah se, goal an mamawh vangin minute 76-naah Dzeko thlakin khelmualah a lut.

Inkhelh zawh tawh hnuah Lazio player Ramos Marchi chu hnawh chhuah a ni! Marchi hian season hmasa lama Lazio tana a khelhpui Correa chu an chak lawm nan a zuan a, ṭhian infiam ni mah se referee-in red card a pe.

Stefano Pioli a lungawi
San Siro-a inkhel tir lam minute 20 chhungin AC Milan chuan goal hnih an phur hman - mikhual Verona tan Gianluca Caparari (7') leh Antonin Barak (24' P) ten goal an khung, mahse a tawpah chuan Milan zawkin 3-2 in hnehna an chang.

Chawlhlawk laiin Stefano Pioli-a'n a naute a fuih ṭha tih a chiang. seconf half-ah a khat mawi tawkin goal thum an khung. Olivier Giroud-a'n khung hmasa berin, a hnuah Franck Kessie leh Koray Gunter ten an khung belh bawk.

Milan manager Pioli chuan, "Kan talbuai hle tih chu zep tur a awm lo. Verona kha hun chanve hma lamah chuan team ṭha zawk an ni a, goal hnih aia tam kan chhuah lo kha kan vannei zawk hlein ka hria.

"Mahse, inkhel hi minute 45-ah a zo mai lo, ka naute khan thapui thawha an beih let chuan hnehna kan la chang thei ang tih an ring a, an rinna chu a takin an lantir. Dinhmun hniama kan din hmasak hnu khan kan puitling tih a lang," tiin a sawi.