Man City-in Burnley an hneh

Premier League champion lai Manchester City chuan Burnley 2-0 in an hneh a, Bernardo Silva leh Kevin de Bruyne ten goal khat ve ve an khung.

Inkhelh hmain Raheem Sterling chuan khelhna hmun a chan tam loh chuan England pawna khelh a hreh loh thu a sawi a, Man City manager Pep Guardiola chuan, "Player hi khelhna hmun ka tiam thei lo a, khelmuala che ṭha ka luhtir ṭhin. Raheem leh player dang pawh kan bula awm turin ka duh a, an hlim lo a nih erawh chuan an chhuak thei ang," tiin a sawi.

Burnley lakah hian Pep-a'n Sterling hi tun season-a a vawi thum nan bul a ṭantir a, English forward hi a che ṭha tawk lo. First half-ah vawi 11 chiah ball a khawih a, outfield player zingah ball a khawih tlem ber.

Second half-ah Sterling hi mual vei lamah dah a ni a, first half aiin hmuhnawm hret mah se goal erawh a khung ta chuang lo. Man City-in hnehna an chan avangin point 17 an hmu a, hmahruaitu Chelsea chu point hnihin an pha lo. Burnley erawhin chak an la nei lo a, point thum hmuin 19-naah an awm mek.