Goal thun kawl Haaland

Erling Braut Haaland chuan Borussia Dortmund tan goal khung a chhunzawm leh ta. A hliam dam hnua a match hmasa berah Haaland chuan goal hnih khungin a club hi Mainz lakah 3-1 in hnehna a chanpui.

Inrinni zan Bundesliga inkhelah Dortmund tan captain Marco Reus chuan minute thumna lekah goal a khung ṭan, striker Haaland-'n goal hnih a khung bawk. Mikhual team tana Jonathan Burkardt goal khungin awmzia a nei phak lo.

Dortmund captain Reus chuan, "Haaland a awm chuan goal a awm ṭhin. Hliam vanga a chawlh zeuh lai pawh khan kan ngai hman hle, tunah chuan a mize pangngai chhuahin goal hnih nen a lo kir leh ta," tiin a sawi.

Kum 21 mi Haaland hian Dortmund tan Bundesliga match 49 a khelh aṭangin goal 49 a khung ta a, inelna hrang hrangah match 68 aṭangin goal 70 a khung tawh bawk a, a hawina lam apiangah goal a khung reng a ni ber.

Marco Rose-a naute hian match riat an khelhah point 18 hmuin hma an hruai, champion lai Bayern Munich aiin point hnihin an sang zawk. Mahse, Bayern hian nizan khan Bayer Leverkusen an hmachawn a, inkhela chak zawk hi a chung berah an awm thei dawn.