Gerrard-a Rangers an chelh

Scottish Premiership hmahruaitu Rangers chu kartawp inkhelah Hearts-in an chelh a, 1-1 in an inhnehtawk. Steven Gerrard enkawl Rangers hian hma hruai chhunzawm zel mah se Hearts nena an inkarah hian point khat chiah a awm phah.

Rangers tan John Lundstram chuan minute 40-naah goal hmahruai a khung a, point thum nen Rangers-in kartawp inkhel an khar mai dawna a lan laiin beisei loh result an hmu.

Craig Halkett chuan minute 90-naah mikhual team Hearts tan si phurh a sut a, hun tawp thlenga goal dang lut loin team pahnih an inṭhen - point khatah Rangers-in lungawi an zir a ṭul.

Gerrard chuan, "Hnehna chan kan phua ka hriat avangin kan result-ah ka lawm lo. First half kan khel ṭha takzet a, mahse, goal hnihna emaw goal thumna emaw khung leh tur kan ni.

"Second half-ah kan khel ṭha tawk lo a, a rei tawlh tawlh a, kan nem tawlh tawlh a ni ber," a ti a, Rangers goal chhuah chhan hi goalkeeper Allan McGregor-a'n Gary Mackay-Steven-a corner aṭanga ball kal a man ngheh loh vang a ni.

Mahse, Gerrard chuan, "Cross ṭha zawka kan dan theih dan kha naktukah chuan ziah a ni mai thei a, mahse, kan buai chhan erawh goal dang khung huna kan khung loh vang a ni," a ti.

Rangers elpui Celtic chuan 2-0 in Motherwell an hneh a, Jota leh David Turnbull ten goal khat ve ve an khung bawk - point liin Rangers an la phak lo mek thung.