Emirates Stadium-ah Vieira kir dawn

Zanin dar 12:30 hian Arsenal chuan Premier League khel turin Crystal Palace an mikhual dawn - Palace hi Gunners legend Patrick Vieira enkawlna hnuaia khel lai an ni.

Vieira hian 2005 khan ropui taka a khelh tawhna Arsenal hi a chhuahsan a, tunah chuan a vawi khat nan a kir leh dawn. Tun hma lama ṭhahnem ngai taka tha a lo thawh tawhna North London club chu hneh a tum dawn.

Gunners manager Mikel Arteta chuan, "Arsenal legend a ni a, fans lam pawhin a phu ang ngeia an lo lawm ka beisei. Club tana a hna lo thawh tawhte avang khan zah a phu, player tam takin an tih theih loh chu Gunners tan hian a lo ti tawh," tiin a sawi.

Vieira kaihhruaina hnuaiah Palace hi an che chhe hran lo, table-ah 14-na an ni mek. Arsenal pawhin lakluh tuma an lo hel tawh Wilfried Zaha kawltu an ni a, ani hi Gunners tlarhnung lam tana ven bik ngai tur a ni ang.

Arteta naute hian season bul ṭan chhe hle mah se an insiamṭha tawh, an league match hnuhnung paliah vawi thum an chak a, ṭum khat chu an khingpuite nen an inhnehtawk - zaninah an chak leh a nih chuan Manchester United an phak lohna chu point khat chauh a ni dawn.