PSG chakna Kylian Mbappe

Lionel Messi leh Neymar te awm lo mah se Kylian Mbappe a awm avangin Paris St-Germain tan buaina a awm lo. France international hian Danilo Pereira goal khung tur a siamsak bakah hun tawp dawnah chakna goal a khung.

PSG hian Inrinni zan khan an mikhual Angers chu 2-1 in an hneh hram a, match 10 aṭanga point 27 hmu tawhin Ligue 1 table chung berah an awm - anmahni hnaih bertu Lens aiin point khua zetin an sang fal tawh.

Paris club hian World Cup qualifier khelh vangin South American player - Messi, Angel di Maria, Leandro Paredes, Neymar leh Marquinhos te an chhawr thei lo a, an ṭhat dan berin an khel thei lo.

Mauricio Pochettino naute hi a league match hnuhnung zawkah an chak lo. Angers lakah pawh goal an chhuah hmasa, minute 36-naah Angelo Fulgini chuan mikhual tan goal hmahruai a khung.

Second half-ah PSG lamin thapui an thawh, hun pawimawh laiah Mbappe a inlar a, a cross ṭha tak chu Pereira-a'n tauh lutin keeper Paul Bernardoni tan dan theih a ni lo - hun tawp hma minute thum chauh awm tawhah Mbappe hian Pierrick Capelle-a'n hand ball vanga a penalty chawi chu a khung leh bawk.

PSG manager Pochettino chuan, "Angers kha table-a palina ni lai an ni a, team ṭha tak an ni. Mahse inkhel pumpui kha kan thlir a nih chuan hnehna chan kan phu zawkin ka hria. Ball kan chang hnem a, goal khung theihna remchang kan insiam hnem bawk.

"Goal tam zawk khung lo mah ila lawmna tur a tam, a eng zawnga thlir chuan RB Leipzig kan mikhual tur atana inbuatsaihna ṭha tak a ni," tiin a sawi a, league bakah Champions League a thlir tel nghal.

Paris club hian Thawhlehni zanah UCL khel turin Leipzig an mikhual zui leh dawn. German club lakah chuan Poch-a'n a player ṭhate a chhawr leh thei dawn tawh; Manchester City an hneh ṭum angin result ṭha neih an beisei ang.