Atletico khelmualah goal khung thiam Liverpool

Tun season inelna hrang hranga tlawm la nei lo Liverpool chuan zanin dar 12:30-ah Champions League match an khel dawn a, Atletico Madrid nen an inkhelh dawn avangin inkhel a hmuhnawm ang.

Liverpool-in Champions League-a an match hmasa pahnihah hnehna an chang ve ve a, point ruk nei chungin hma an hruai mek. Zaninah hnehna an chan chuan last 16 lut tawh ang hiala sawi ngam an ni dawn.

Atletico Madrid erawhin match hnih aṭangin point li an nei mek a, group hmahruaitu ni chunga last 16 luh an mitthla dawn a nih chuan zaninah chak an mamawh.

Group B inkhel dangah Porto chuan zanin dar 12:30-ah AC Milan an mikhual dawn a, team pahnih hi chak la nei lo ve ve an nih avangin an tan knockout round lut turin tlawm a thiang tawh lo.

Chanchin lawmawm
Liverpool an mikhual hmain Atletico Madrid-in chanchin lawmawm an dawng a, a tira chhawr theih loh tura ngaih centre-back Jose Gimenez leh midfielder ṭha Marcos Llorente ten club training an zawm leh tawh a, Matheus Cunha a dam bawk.

Atletico hi Gimenez inhliam vangin an rilru a buai hman a, midfielder Geoffrey Kondogbia chu centre back angin an chhawr dawn nia sawi thawm hial a awm hman - mahse, inkhel pawimawh thlen hmain Gimenez a dam hman a, inhliam leh hrem tawk Stefan Savic pawh an ngai lutuk lo tura ngaih a ni.

Hei mai a ni lo - Liverpool-in hah taka an inkhelh zawhah Madrid lam an pan nghal a, an chau dawn tih a chiang. Mahse, Atletico erawh La Liga duhsakna dawngin kartawp inkhelah an awl a, player-ten harhvang tak chungin Reds an mikhual thei ang.

Tlarhmaah Liverpool striker hlui Luis Suarez chu ven bik ngai a ni leh dawn a, tun season-a goal nga khung tawh striker hian a club hlui lama goal khung inthlahrun a tum dawn lo.

Atletico an ṭha
Diego Simeone-a enkawl team an nih chuan eng team pawh an huphurhawm a, Atletico Madrid-in squad an neih chhah bawk avangin Reds tan hna a awlsam dawn lo.

Liverpool fan-ten Suarez an hre lar sa a, ani pui tura Antoine Griezmann a awm leh tak bawk avangin Atletico tlarhma an ṭha sawt - Joao Felix chu bench lamah an dah thei tlat!

Midfield thlirin Koke, Rodrigo de Paul leh Thomas Lemar te ho an awm a, wing back Yannick Carrasco pawh hi a thiamna sawi hmaih a rem lo.

Atletico hian Liverpool an mikhual hmaa an match hnuhnung berah 2-0 in Barcelona an hneh bawk a, inkhel chau lo, hahdam tak chungin Liverpool thlen hun an nghak.

Hei le Reds
Wanda Metropolitano-a Atletico hneh tura team ṭha tawk an awm a nih chuan Liverpool an ni - Jurgen Klopp-a team te hian season hmasa an hman ṭhat tawk loh hnuah tun season-ah an ṭhat dan berin an khel leh tawh a, an hmuhnawm takzet.

Liverpool hian an match hnuhnung berah Watford chu 5-0 ngawtin an sawp a, goal khung nuam an ti leh tawh hle - Mohamed Salah (10 goals), Sadio Mane (6) leh Roberto Firmino (6) ten season an hmang ṭha leh tawh hle.

Hetihrual hian Atletico-in tlarhnungah khawvela keeper ṭha ber ang hiala tam takin an ngaih Jan Oblak an nei a, Reds tlarhma pathum nena an intawng tur hi a hmuhnawm loh ring suh.

Liverpool fan-ten an la theihnghilh loh chu kum 2020 kha a ni - Atletico Madrid-in last 16 aṭangin Anfield-ah ngei Reds an pet chhuak a, Merseyside club ṭantuten phuba lak an châk ang.

Buaina chu
Atletico-in kartawp inkhel nei lo chungin mahni awm hmunah Liverpool an lo mikhual dawn a, an hahdam - Reds erawh Watford khelmuala inkhel turin kilometre 260 chuang an zin a, hahdam hman loin Madrid an pan zui.

Chu chauh a ni lo - Atletico nen an inkhelh zawhah Premier League khel turin Manchester United khelmualah Pathianni zan khian an leng zui dawn a, Klopp-a'n fimkhur taka player rem a ṭul dawn.

German coach hian Watford lakah international break-a inkhel chau Diogo Jota chu bench-ah a dah a, a aia lut Firmino-a'n hattrick a siam. Player pahnih inkara Klopp-a thutlukna hriat a châkawm a, Firmino-a'n bul a ṭan erawh a rinawm mah zawk.

Brazil tana inlan vanga Watford hmachhawn thei lo Alisson Becker leh Fabinho ten Madrid khawpui an pan tlang avangin an inlan ngei a rinawm a, Trent Alexander-Arnold, Andy Robertson leh Virgil van Dijk te pawh neitu team hian tlawm tur ringawta Spain pan nih an duh dawn lo.