Paul Badosa tan nomawi

Paula Badosa-i chu amah aia thawnhriat nei ṭha zawk Victoria Azarenka-i'n chhaih buai viau mah se a chiai duh bik lo a, BNP Paribas Open (Indian Wells) final inkhel hmuhnawm leh boruak sang takah 7-6 (7-5), 2-6, 7-6 (7-2) in hnehna a chang.

Nimin zing inkhelah hian Azarenka chu dinhmun ṭha a ding hmasa zawk a ni, point hnih hmuh belh zauh se la chuan a vawi thum nana champion thei a ni a, hetih lai hian ama service lai a la ni zui.

Mahse, Badosa hi India Wells Masters final a khelh hmasak berah a zam duh bik lo, darkar hnih leh minute li an inkhelh hnuah Spanish nula hi a chak a, tun season chhunga nomawi a chawi vawi hnihna a ni.

May thla khan Badosa hian Belgrade Open-ah nomawi a lo chawi tawh bawk, atan chuan season duhawm a ni. World number 27 Badosa chuan, "Tun tournament aṭanga ka thil zir chhuah chu, tum chuan kawng a awm tih hi a ni," tiin a sawi.

Badosa hian Indian Wells match ruk a khelhah hnehna a chang vek tihna a ni a, 2019 champion Bianca Andreescu hnung a zui chiah. Canadian nula Andreescu hian 2019 US Open nomawi a chawi hnuah a vawi khat nan BNP Paribas Open a khel a, nomawi a chawi nghal a ni.