Cameron Norrie a champion

Indian Wells Masters khelh zawh takah Cameron Norrie a champion. Britain tlangval zingah Norrie hi California thlalera inelna neihah hian champion thei hmasa ber a ni a, nomawi chawi tur hian Nikoloz Basilashvili chu 3-6, 6-4, 6-1 in a hneh.

Kum 26 mi Norrie hian set hloh hmasa mah se huaisen takin a tho chhuak. Tun season bika match 47 a chakna niin tennis a khelh hun chhunga kum a hman ṭhat ber ṭum a nih bakah Indian Wells hi a nomawi chawi zinga hlu leh sang ber a ni bawk.

ATP final bik chu vawi hnih a khelhna niin, kumin tir lam khan Los Cabos-ah hlawhtlinna a lo chang tawh bawk; Grand Slam dawt chiaha inelna sanga a hlawhtlin avang hian a ranking pawh a kang dawn.

Tun kara world ranking chhuak tharah Norrie hi a sang zual 20 zingah a tel phak tawh dawn, an ram British bikah pawh Daniel Evans khumin number 1 dinhmun a chelh dawn bawk - boruak ṭha lam hlirin a zui rih a ni ber mai.

Norrie chuan, "Basi-lashvili kha a ball vuak a nain winners a nei thei viau a, set hmasa ber bikah phei kha chuan ka tan tih ngaihna a awm lo a ni ber mai. Set hnihnaah 5-4 a hma ka hruai lai aṭangin ka khel ṭha zual a, a hnu lam chu a awlsam ta deuh.

"Hnehna ka chan hi ka nu leh pa tan ka hlan, tun dinhmun ka thlen theih nan hian kawng engkima hma min laksaktute an ni a, a tawpna ni loin a bul ṭanna a nih ngei pawh ka beisei," tiin hlawhtlinna a chan laiin a nu leh pa a hre reng.

Norrie hi South Africa-a piang a ni a, a pa chu Scottish mi niin a nu chu Welsh mi a ni thung. New Zealand-ah sei lianin United States-ah college a kal a, hetah hian tennis a khel; a tleirawl chhuaha hun a hmanna London a nih avang leh a nu chawr chhuahna a nih avangin Britain hmingin a khel a ni.