Neitu thar nei Newcastle-in Spurs an hneh lo

Saudi Arabia Public Investment Fund-in Newcastle United an lei hnua an match hmasa berah Tottenham Hotspur lakah 3-2 in an tlawm. St James' Park-ah Magpies-in Callum Wilson hmangin khung hmasa mah se Spurs-in Tanguy Ndombele, Harry Kane leh Son Heung-min te hmangin an chhanglet.

Boruak a sang
Newcastle-in neitu thar an neih avangin club chhungah phurna thar a awm tih a hriat a, St James' Park boruak a ṭha hle. Club neitu thar Yasir Al-Rumayyan leh Amanda Staveley te pawhin inkhel hi a hmunah an en a, squad ngai chiah a ni nachungin mipui phurna chu hmuh hmaih rual a ni lo.

Magpies hian bul pawh an ṭan ṭha a, minute hnihna lekah Javier Manquillo cross chu Callum Wilson-a'n a tauh goal. Manager Steve Bruce tan a lawmawm zual a, Newcastle manager hna chelh chhunzawm turin chet ṭhat a mamawh.

Kane nge nge
Newcastle-in bul ṭan ṭha mah se an nihna tak a lang zui a, an tlarhnung a phui lo. Tanguy Ndomdele-a'n minute 17-naah siphurh a sut a, Magpies defender Jamaal Lascelles-a'n a tih tur a ti lo.

Minute 22-naah Kane-a'n Newcastle offside trap bumin, cool takin Pierre-Emile Hojbjerg hnen aṭanga a ball hmuh chu keeper Karl Darlow pet khumin hmahruaina goal atan a khung.

Lucas Moura, Kane leh Son ten Magpies tlarhnung an ṭhiat zui a, England captain cross chu South Korean star hian chiang takin a pet goal. Halftime-ah Spurs in 3-1 in hma an hruai tawh.

Coach thar?
Newcastle bench aṭanga rawn lut Jonjo Shelvey chuan yellow card vawi hnih a hmuh avangin mualneitu hi player 10-in an khel tluan. Magpies hian siphurh sut ṭhen leh mah se an goal khung belhna hi Spurs defender Eric Dier-a'n an lama a sut luh palh a ni.

Hun tawp dawn hnaiah 3-2 ni mah se Magpies-in Spurs an tibuai thei lo a, mikhual team hian hun khawhral nan an khingpui hi a kat kual a, an phu ang ngeiin hnehna an chang.

Newcastle hian match riat aṭangin point thum chiah an hmu a, relegation zone-ah an awm mek. Spurs lakah Steve Bruce-a'n Newcastle la enkawl mah se kum 60 mi English manager hian a hna hi a chelh rei a rinawm tawh lo.

Fan damlo a ngaihtuahawm loh
Newcastle United leh Tottenham inkhelh lai hian East Stand-a inkhel entu pakhat chu lungphu chawl vangin a tlu a, amaherawhchu enkawlna ṭha a dawn nghal avangin a nunna an chhan hman. Spurs defender Sergio Reguilon chuan rang takin referee Andre Marriner a hrilh a, Eric Dier chu mual sirah tlan nghalin medical staff te chu defibrillator nena inkhel entu buaipui nghal turin a hrilh. Medical staff-in fan an buaipui lai hian minute 20 chhung inkhelh chawlh lailawk a ni a, first half-ah hian injury time-ah minute sarih lai pek belh a nih phah bawk.