Roma ngam loh Juventus
Jose Mourinho hoin AS Roma chuan thawm nei ring viau mah se Juventus an ngam lo. Old Lady hian an player ṭha ṭhenkhat chhawr thei lo chungin an mikhual hi 1-0 in an lo hneh - Max Allegri nauten an ze ngai an chhuah leh ta.
Bianconeri tan hian Moise Kean chuan minute 16-naah goal awmchhun a khung a, tun hnaiah Juve hian Serie A match an khelh hnuhnung paliah hnehna an chang vek; point 14 an khawl khawm ve leh tawh.
Goal khat chauh
Pathianni zan Allianz Stadium-a inkhelah Paulo Dybala an chhawr thei lo, striker Alvaro Morata chu dam hlim a la nih avangin bench lamah hun hman hmasak tir a ni; tlarhmaah Kean leh Federico Chiesa te an awm.
Everton aṭanga loan hmanga an hawh Kean hian Rodrigo Bentancur-a thawh rah sengin a tauh lut. Roma defender ven kara ball tauh turin sang takah a zuang a, tun season chhunga a goal hnihna chauh ni mah se Juve chak nan a tawk.
Roma lamin si phurh sut theihna remchang an nei. Tammy Abraham-a'n penalty a hlawh chhuak a, pet tumin ball pawh a la. Mahse, Jordan Veretout-a'n chhuhsakin a pet a, keeper Wojciech Szczesny-a'n a lo dansak a ni.
Hun tawp dawn lamah Juve zawkin an khung belh theuh viau, Federico Bernardeschi-a bicycle kick chu keeper Rui Patricio-a'n a lo dang. Italy international-in hun ṭha a neih hnuhnung zawkah pawh Wolves keeper hlui hi a paltlang thei lo.
Lawm leh lawm lo
Juventus manager Max Allegri chuan, "1-0 hi result ṭha a ni, ka duh dan chiah pawh a ni. Roma laka goal chhuah loa hnehna chan kha a hlu, team ṭha leh khawng an nih bakah counter attack hmang thiam an ni," tiin an result-ah a lungawi.
Turin club lian hian season bul ṭan fuh lo mah se an insiamṭha leh tawh. Nilaini zanah Champions League khel turin Zenit an tlawh dawn, kar tawpah champion lai Inter Milan an lenchilh zui leh ang - an hmabak a hautak dawn hle.
Roma manager Mourinho chuan, "Thil pakhat ka hmu, ka thil hmuh chu ka naute hnenah pawh ka hrilh. Chu chu Roma team ṭha tak ka hmuh chungchang a ni - inpekna, inrintawkna, huaisenna leh beiseina ka hmu vek. Hnehna chan phu zawk kan ni.
"Tun hma deuh kha Allianz Stadium-ah hian khel ṭha vak lo chungin hnehna kan chang tawh, tun ṭumah chuan a ṭha zawk ni chungin kan chak lo, football hi chu a mak ṭhin ngawt mai," a ti. Penalty pet kawngah Abraham chu Veretout leh Lorenzo Pellegrini te hnunga awm a nih thu a sawi bawk.