PSG leh Man City tan chak a ṭul
Europe club ṭha pahnih Paris Saint-Germain leh Man-chester City te Champions League group khatah an awm dun a, champion tura rinkai ni pha ve ve mah se vanduai chuan tla thei ve tho an ni.
Zanin dar 10:15 hian Manchester City-in PSG chelhtu Club Brugge an tlawh dawn a, Lionel Messi telna French club-in RB Leipzig an mikhual thung ang.
Thil awm dan
Man City-in an match hmasa berah RB Leipzig 6-3 in sawp mah se match hnihnaah PSG 2-0 in an hneh lo. French club hian elpui tur bera ngaih Pep Guardiola hote an hneh nachungin match hmasa berah Club Brugge nen 1-1 in an inhnehtawk.
Belgian club hi an tlo hle, PSG laka point khat hlu tak an hlawhchhuah hnu hian RB Leipzig chu 2-1 in an hneh. German club erawhin point an la hmuh loh avangin knockout stage luh an harsat dawn a, chutihrualin Leipzig hi season liam taa Manchester United pet tlatu an nih tih hriat a ṭha.
Messi telna PSG
PSG hian season ṭha tak an hmang a, Champions League bakah Ligue 1-ah hmahruaitu ni mek mah se Lionel Messi vang tia sawi theih a la ni lo. Tun dinhmunah hi chuan Argentina captain awm vang ni loin Mauricio Pochettino hote chet ṭhat chhan hi squad an neih ṭhat vang a la ni zawk.
Chutihrualin PSG an che ṭha han tih hian an player neih ṭhat ngaihtuah chuan an result hi a la ṭha tawk lo a, France legend Thierry Henry phei chuan khelh dan phung nghet an la neih loh thu a sawi.
PSG hian Man City an hneh hnuin Rennes lakah 2-0 in an tlawm a, international break zawhah Angers 2-1 in an hneh hram. French club tan tun season-ah Kylian Mbappe a la ṭangkai ber a, Angers an hneh ṭumin pawhin chakna goal a khung.
French club-in World Cup qualifier vangin South American player Messi, Neymar, Marquinhos, Angel di Maria leh Leandro Paredes te chhawr theih loh chang an nei. Chumi awmzia chu PSG player-te hi an khel ho tam tawk lo tihna a ni a, khelmualah an la inhrechiang tawk lo.
Nipui bazara thawm nei ring Messi pawhin goal khat chiah a la khung a, hriat tel tur erawh match nga chauh a la khel. Messi, Neymar leh Mbappe ten ṭum hnih chiah bul an la ṭan ho a, MNM ṭha zawk hmu tur chuan an khelh ho tam a ṭul.
PSG-in nuamsa zawka group stage an paltlang theih nan zanin hian RB Leipzig an hneh ngei a ṭul a, Messi pawhin player ṭha bik a ni tih lantir nan goal a mamawh. Chutihrualin Leipzig tan knockout stage luh beiseina nei chhunzawm turin point hlawhchhuah ngei a ṭul a, German club hi a kaw tawpa an ṭan dawn avangin a harsa ang.
Pep leh UCL
PSG-in Champions League nomawi chawi tuma sum an sem tam ang bawkin Manchester City pawhin sum an seng nasa, Pep Guardiola hote hian season liam ta khan an hun ṭha neih an bawhpelh avangin tun season-ah a bul aṭanga an ṭan ṭhat a ṭul.
Premier League champion hian tun hmain Club Brugge hi an la hmachhawn ngai lo a, tun season bika an khelhna thlir hian Belgian club hi zuam ngawt a thiang lo ang. Club Brugge hian kartawpah Kortrijk hi 2-0 in an hneh a, Ruud Vormer-a'n goal hnih a khung.
Brugge hian Belgian leh Dutch rawlthar duhawm Charles De Ketelaere leh Noa Lang te an kawl a, PSG lakah pawh buaina an thlen hnem hle. Belgian club keeper hi Liverpool keeper hlui Simon Mignolet a ni bawk.
Amaherawhchu sum hmang tam Man City hi Brugge hneh turin an ṭha tawk. Tun hnaiah Raheem Sterling-a'n khelhna hmun a chan tam loh chuan chhuah a pawi tih loh thu a sawi a, English forward hian khelmualah a theihna a pholan a ṭul.
English club hian season ṭantirhah an thiampuipa Kevin De Bruyne an chhawr nghal theih loh avangin bul an ṭan ṭha tawk lo a, tunah erawh an dam kim tawh avangin an khel a nghet ṭha leh tawh hle. Man City hian PSG an hneh loh ṭum pawhin team ṭha an ni tih an lantir thei a, Club Brugge lakah khel ṭha chunga point thum hmuh tel ngei an tum dawn a ni.