NEIDA-in MFA hnenah thilpek an pe

Tata Trusts hnuaia NGO pakhat, Northeast Initiative Development Agency (NEIDA) chuan nimin khan Mizoram Football Association hnenah Mizoram aiawha zin chhuak tura inpuahchah mek, AR Lammual a hmeichhe football team camp nei mekte ei leh in tur leh mamawh dang ṭhahnem tak an hlan.

MFA hnena NEIDA thilpek hi football equipments hrang hrang, Covid hri dona hmanrua leh Mizoram team camp mekte ei leh in tur buhfai, dal, tel bakah taksa tihfaina hmanraw dang ṭhahnem tak a ni a, an thilpek hi Rs. 1,00,000 (cheng nuai khat) man hu a ni.

NEIDA State coor-dinator B. Lalrinkima chuan, "NEIDA leh MFA te hi hun rei tak chhung kan lo thawkho tawh a, kan thawhhona hian rah ṭha tam tak chhuah tawhin, hlawhtlinna ṭhahnem tak kan chang ho tawh a; hun khirh tak kara hetiang thawhhona kan nei leh thei hi a lawmawm kan ti takzet a ni," a ti a. "Mizoram aiawha fehchhuak tur mipa leh hmeichhe senior team te pawh NEIDA chuan duhsakna sang ber a hlan a ni," a ti bawk.

NEIDA aiawhin R. Lalnunsanga, Senior Accounts & Admin chuan thilpek hi a hlan a, MFA nena thawhhona ṭha neih zel an duh thu a sawi bawk. MFA Sr. vice president PC Vanlalhruaia chuan NEIDA, Tata Trusts ten MFA senior team pahnih training mekten an mamawh em em - training materials leh ei tur tuihnai tak tak an rawn hlan chu lawmawm a tihzia a sawi ve bawk.

Mizorama Football inelna kum hnih dawn a chawlh tawh hnuin MFA chuan Santosh Trophy-a Mizoram aiawh tur player engemawzat a ko khawm a, AR Lammual ah kar thum chuang training a pe tawh a, Senior Men's team hian November thla hian Northeast Zone Qualifying round an khel dawn a ni. Hetihrual hian National Senior Women's Championship khel tur pawh ko khawmin AR Lammualah kar khat chuang training a pe tawh bawk a ni.