Real Madrid tan ze pui chhuah a ngai
Champions League champion hnem ber Real Madrid hi Sheriff Tiraspol nen an inkhelh dawn khan chiang taka chak tura ngaih an ni a, mahse a vawi khat nana UCL kheltu Moldovan club lakah hian an tlawm, an chak lohna hi Santiago Bernabeu a ni.
Spanish club ropui hian zanin dar 12:30 hian Olympic stadium-ah Shakhtar Donetsk an lenchilh dawn, kar tawpah La Liga match an khelh loh avangin UCL atan inbuatsaihna an nei ṭha - Carlo Ancelotti nauten tha tharin chak an tum ang.
Fimkhur a ngai
Season hmasa khan Real leh Shakhtar hi group pakhatah an awm dun a, an inkhelh vawi hnihah Ukrainian club hi an chak ve ve; Sheriff laka mualpho tawh Real tan fimkhur taka khelh a ngai dawn.
Group D-ah hian a tira rin hlawh lo ber Sheriff hi hmahruai mektu an ni, point ruk an nei tawh. Hei vang hian last 16 lut tura inum boruak a sang dawn a, chetsual a pawi thui thei tawh dawn a ni.
UCL bikah chuan Real hi tun hmain Bayern Munich (match 4) leh Juventus (match 3) te lakah a zawnin an chak lo. A zawna vawi thum hneh loh hi club pahnih chiah an la nei, anmahni aia squad ṭha lo zawk Shakhtar lakah chuan record chhia siam an duh lo ang.
Hliam an tam
Karim Benzema khelh ṭhat zia inhrilh nawn a ngai lo, France international hi club leh ram tan innghahna a tling; goal a khung theih bakah assist a nei reng. Tun season Real tana match 10 aṭanga goal 10 khungtu hi Shakhtar lamin hmachhawn an chak dawn lo.
Benzema nei mah se Real hian buai rukna an nei, chu chu hliam an ngah lutuk hi a ni. Eden Hazard leh Dani Carvajal ten mimal training an nei tawh a, mahse an la inlan dawn lo. Luka Jovic, Gareth Bale leh Dani Ceballos te pawh an la inpeih lo bawk.
Chanchin lawmawm erawh Alaba a lo kir leh thei tawh. Bayern Munich defender thar hi Brazil international Eder Militao nen an inkawp thei a nih chuan tlarhnung lam a zia hret ang; Italian manager Ancelotti-a'n a ṭul a nih chuan Alaba hi a sirah a chhawr thei bawk ang.
Chak ngai Inter
Season hmasa khan Antonio Conte kaihhruaina hnuaiah Inter Milan hian fal takin Serie A nomawi an la, mahse Champions League group stage pawh an paltlang zo lo. Tun season-ah pawh Italian club hi last 16 hmel hmu lo thei dinhmunah an ding mek
Simone Inzaghi enkawlna hnuaiah league lamah chuan an che fuh viau, chutih rualin Lazio laka mualpho hlim an ni. Inter tan Sheriff hi insiamṭhatna remchang a ni dawn, kar tawpah Juventus an hmachhawn zui dawn avangin inrintawkna neih an mamawh takzet.
Inter leh Sheriff hi an vawi khat intawnna tur a ni satliah lo. Italian club leh Maldovan club hrim hrim European football-a an inkhelh hmasak ber tur a ni dawn, club bakah ram angin record thar siam theihna a ni ang - Santiago Bernabeu luh chhuah thei club hi San Siro a nih avangin an zam lo ang.