Dutch league-ah stadium a chim

Pathianni zan khan Dutch club Vitesse Arnhem chuan an ram league sang ber Eredivisie-ah Nikolai Baden Frederiksen goal hmangin NEC Nijmegen chu 1-0 in an hneh a, Vitesse player-ten an fan-te nena chak an lawm laiin fans lamna stadium stand pakhat chu a chim!

Vanneihthlak takin stadium chimah hian fans inhliam an awm lo hlauh a, Nijmegen khawpui mayor Hubert Bruls chuan thil thleng chuan a barakhaih thu a sawi.

Hubert Bruls chuan, "Vanneihthlak takin ka hriat chinah chuan inhliam an awm lo a, mahse, stadium dinna a chim theih dan kha chhui chian thuai ka duh a ni," a ti.

Hetihlai hian Dutch football-a thuneitu sang ber Royal Dutch Football Association (KNVB) chuan thil thlen dan chu chhui ngei an duh thu an sawi ve bawk.

KNVB chuan, "Hmun him ni tura ngaih stadium a chim a, hei hi chhui chian a ṭul a ni," an ti a, hetihlai hian Netherlands-a hetiang thil chhuichian lam changtu thupuangtu chuan chhui a nih dawn leh dawn lohah thutlukna an la siam loh thu a sawi.

Dutch league-ah hian match kua khel tawh Ajax chuan point 22 hmuin hma an hruai mek a, khelh zat inanga point 21 neitu PSV Eindhoven chu pahnihna an ni mek.