I League chawi nung tur Mohammedan

November 20-ah Indian Super League khelh ṭan a ni dawn a, he inelna hmachhawn tur hian I League ti hlutu Mohun Bagan leh East Bengal chuan I League tlansanin ISL an zawm. 

Bagan leh East Bengal an awm loh takah chuan I League hlutna hi tlahniam sawt tura ngaih a ni a, mahse hetiang boruak karah hian Mohammedan SC chu I League khel turin an inpetkai. 

Mohammedan hi East Bengal leh Bagan-te nen 'Big Three' tia koh an ni ṭhin a, I League an khelh dawn takah chuan Kolkata club lian pahnih awm loh hnua I League awi nung tura beisei an ni - an boruak a lian nghal hle. 

I League hi December kartawpa khelh tura ruahmanna a awm zet a, mahse  All India Football Federation (AIFF) chuan January 9-ah khelh turin a tichiang tawh.

Mohammedan bakah hian sum hmanga hmun ruak leitu Sudeva FC chu I League club thar tur an ni. 

I League-a tling thar club pahnih bakah hian Real Kashmir FC, Punjab FC, Chennai City FC, Gokulam Kerala, Churchill Brothers, Indian Arrows, Neroca FC, Aizawl FC leh Trau FC chuan inelna hi an hmachhawn dawn a, club 11 an inel dawn. 

I League-ah hian match 80 awm tura ruahman a ni a, team 11 hi vawi khat ṭheuh an inkhelh kual hnuah second phase a awm leh ang - top six chin chu group khatah dahin an inkhel kual ang a, champion tur an zawng ang. A hnuai lam panga hian inkhel kualin a tla tur an zawng ve leh dawn thung. 

Black Panther (Mohammedan sawina) boruak a lian a, an vanneih telna chu inelna hi Kolkata-ah vek khelh tur a ni dawn - Covid-19 vangin AIFF chuan home & away-a I League hi khelh chiah a ngai lo. 

Kolkata club hian an khelmual hriatchian saah hlir match an khel dawn tihna a ni a, hei lo liama chance ṭha a awm chuang lo - I League an lo kir lehna season-ah an champion nghal a nih pawhin mak ti suh. 

Mohammedan hian Spanish coach Jose Hevia chu an coach turin an la fel chiang tawh a, UEFA Pro Licence nei coach hi Shillong Lajong, Pune City FC leh Minerva Punjab-ah te pawh coaching staff zinga tela, hna lo thawk tawh a nih avangin Indian football-ah a mikhual lo. 

Black Panther-in player thar an lakluh thu an puang deuh reng a, tun hnaia hming langsar an lakluh chu Bangladesh captain Jamal Bhuyan a ni.

Kum 30 mi midfielder hi Bangladesh chhuanvawr a ni a, Denmark-a piang niin Danish club ṭha Brondby IF leh F.C. Copenhagen aṭanga inzir chhuak a nih avangin dah hniam theih a ni lo. 

Bhuyan hian a career ṭantir lamah Danish second division club Hellerup IK leh BK Avarta tan a lo khel tawh a, season hmasa khan Bangladesh club ṭha Saif SC tan a khel. 

Mohammedan general secretary Sk. Wasim Akram chuan ISL khelh an phu thu a lo sawi tawh a, he inelna thlirsa hian Black Panther hi an bazar ang hialin a ngaih theih. 

La Liga club Granada defensive midfielder hlui Mohammed Fatau an lalut tawh a, Turkish Super Lig club thleng lo khel tawh a nih avangin Fatau hi a tawnhriat ringawt pawh ṭhatpui tham a ni - kum 27 chauh a la ni tih hriat tel a ṭha. 

Nigerian forward, Bangladesh Premier League lama goal khung uar tak Raphael Ownrebe chu Mohammedan hian an lalut tawh bawk a, tawnhriat nei ṭha Indian player langsar tak tak an kawl bawk - Mizo player Vanlalbiaa Chhangte pawh a awm. 

I League club hrang hrangin chanchin an nei deuh reng a, Aizawl FC pawh transfer bazar-ah an thawm hriat tur a awm reng. Mahse, Mohammedan bakah a vawi khat nana I League khel tur Sudeva FC chu ngaihven hlawh an ni. 

Sudeva neitu Anuj Gupta chuan Vanglaini hnenah Indian player hlanga an season hmasa ber an hmachhawn tur thu a sawi a, Mizo player pawh an melh tur thu a sawi - a sawi ang ngeiin Mizo player an kawl nual. 

Bhutanese coach Chencho Dorji hnuaia khel tur club hian Chennaiyin defender hlui Zotea Ralte, Bengaluru defender hlui Sairuatkima, Aizawl FC left back hlui Lalramhmunmawia, ATK midfielder hlui Malsawmzuala leh an academy chhuak Vanlalzahawma-te an nei a, Mizo ṭantu an ngah dawn.