Barcelona an chak; beiseina a vul
Tluk leh din fawm reng renga hun hmang Barcelona-in an fan-te tan beiseina thar an siam ve leh ta a, eng tiang taka rei nge a daih leh ang, tih erawh engkim hretu chauh lo chuan an hre lo.
Pathianni zan khan La Liga inkhelah Barcelona hian an mikhual Valencia chu 3-1 in an hneh a, mikhual team tan Jose Gaya chuan goal hmahruai khung mah se Ansu Fati, Memphis Depay leh Philippe Coutinho ten Barca tan an chhanglet.
Barcelona-in hnehna an chan avangin table-ah pasarihna dinhmun an luah ve ta a, match riat an khelh aṭangin point 15 an nei a, khelh zat inanga Real Madrid leh Atletico Madrid an phak lohna chu point hnih chiah a ni ta.
Catalan club hi inelna hrang hranga an match hnuhnung parukah vawi khat chiah an chak a, Pathianni zan an result hian inrintawkna thar a pe ang - Nilaini zanah Champions League khel turin Dynamo Kiev an mikhual zui dawn.
A hming Fati
Nou Camp-ah mikhual team Valencia-in hma an hruai a, minute ngana lekah Gaya chuan goal hmahruai a khung - season dang ang chu ni se 'a mak' tih tur a ni a, mahse, tun season-ah chuan thilmak a ni tlat lo.
Barca an hnufual rei lo thung - goal an chhuah aṭangin minute riat a liam a, Ansu Fati chuan jersey number 10 hak a phu tih pholan chhunzawmin si phurh sutna goal a rawn khung a, Depay-a siamsak a ni.
Minute 41-na a ni a, Fati bawk kan hmu nawn. Messi kalsan tak jersey number hatu hian penalty a hlawh chhuak a, a pet turin Depay a rawn pen chhuak.
Barca a pan avanga a inchhir loh thu sawitu Depay-a'n penalty hi goal-ah a chantir a, Catalan club ṭantute tan Fati leh Depay inkawp rem tak en a nuam khawp ang.
Hei le Coutinho
Hun tawp nan minute nga chiah a awm tawh a, Barca tan Coutinho a inlar - Liverpool aṭanga Nou Camp a pan hnua beisei phak lo player hian a thiam a la theihnghilh lo tih a pholang a, chak nemnghehna goal a khung.
Brazilian midfielder hian November 2020-a Osasuna 4-0 a an hneh ṭuma goal a khung hnua a khung leh hmasak ber a ni a, Valencia laka a goal hi goal tam zawkin a zui a beisei ang.
Barcelona boss Ronald Koeman chuan, "Coutinho chungah hian rinna ka nghat reng ṭhin," tiin kum 29 mi midfielder a rin reng thu a sawi a, Coutinho tan hun ṭha a her chhuak ve ṭan ta.
Catalan club a pan hnua a vawi khat nan Sergio Aguero chu minute 87-naah bench aṭanga luhtir a ni bawk a, Argentine forward tan May 2011-a Atletico Madrid tana Real Mallorca laka hattrick a siam hnua La Liga-a a inlan leh hmasak ber a ni.
Madrid khaw club
Kartawp La Liga inkhelah Real Madrid leh Atletico Madrid an inlan lo a, Madrid khaw club pahnih inlan loh chhan hi South America lamin World Cup qualifier an khelh tlai vang a ni.
Real leh Atletico ten South American player an neih hnem avangin La Liga chuan club pahnih fixture chu an sawnsak a, kartawpa inkhel chau loin Champions League an khel thei dawn.
La Liga-ah hian rin loh taka hmahruaitu chu Real Sociedad an ni a, Inrinni zana 1-0 a Mallorca hnehtu team hian point 20 hmuin league table chung ber an luah mek.
Chutihrual chuan Sociedad hian an hnuaia awm Real, Sevilla leh Atletico aiin match khatin an khel tam a, an san zawkna hi point thum chauh a nih avangin pawr chiam a rem rih lo.