Everton mualah Hammers an chak

Pathianni zana Premier League club intiat tawk inkhelah West Ham chuan 1-0 in Everton an hneh a, Angelo Ogbonna chuan inkhela goal awmchhun hi a khung.

Hammers-in hnehna an chan avangin table-ah pasarihna an ni a, parukna Manchester United leh an hneh tak Everton te nen an point hmuh zat a inang.

David Moyes-a tan Rafael Benitez-a enkawl team hneh hi a nuam ang - coach pahnih hi Liverpool khawpuiah an lo inel tawh ṭhin a, Moyes-a'n Everton a enkawl lai khan Benitez-a'n Liverpool hmangin Scottish manager a nau en ṭhin.

Kum 2021 a herchhuah meuh erawh chuan Moyes-a'n thawnthu a her danglam ve ta a, a tan chuan result hlu bik a ni.

Everton tan nipui transfer-a player lakluh Demarai Gray leh Andros Townsend chu player langsar an ni ṭhin a, mahse, Pathianni zanah erawh hliam vanga inlan thei lo Dominic Calvert-Lewin leh Richarlison tel loin Everton tlarhma an hriam tawk lo.

Merseyside club-in chance nei lo erawh an ni lo - Kurt Zouma chuan Gray-a shot goal tur nia lang chu a dansak a, hetihrual hian Jarrod Bowen-a khung tur nia lang chu Everton keeper Jordan Pickford chuan ṭha takin a dang ve bawk.