Bayern Munich class a sang

Bundesliga-ah champion lai Bayern Munich chuan Pathianni zan khan BayArena-ah mualneitu Bayer Leverkusen chu 5-1 in an sawp. Bavarians tan hian Robert Lewandowski leh Serge Gnabry ten goal hnih ve ve an khung bakah Thomas Muller-a'n goal khat a khung ve bawk.

Julian Nagelsmann-a hote hian match riat khelh aṭangin point 19 an hmu a, hmahruaitu an ni mek. Bayern hian Nilaini zan dar 12:30 hian Estadio da Luz-ah Benfica nen Champions League group match an khel leh ang.

BayArena-ah Bavarians-in first half-ah goal nga an khung tawh. Minute thumna lekah freekick aṭangin Bayern-in an khung nghal a, Lewy hian a kheng lut nalh hle.

Minute 30-naah Alphonso Davies-a thawhrah sengin Lewy hian a goal hnihna a khung. Hemi hnu hian a goal zawt zawt a ni ber. Minute 34-naah Niklas Sule ball pet chu Thomas Muller-a'n dang kawiin Leverkusen keeper Lukas Hradecky tan save ngaihna a awm lo.

Minute khat hnuah vei lam aṭanga Muller-a cross chu Gnabry-a'n goal-ah a chantir a, Gnabry bawk hian minute 37-naah Leon Goretzka nen an in wall pass hnuin Bayern goal ngana a khung.

Leverkusen mualpho lutuk tur tih ziaawm nan Patrik Schick-a'n minute 55-naah siphurh a sut ṭhen a, Czech striker ball petu hi German rawlthar duhawm Florian Wirtz a ni.