Ajax khingpui tur Dortmund

UEFA Champions League-ah Ajax leh Borussia Dortmund ten bul an ṭan ṭha a, an match hmasa pahniha Besiktas leh Sporting Lisbon an hmachhawn ṭumin hnehna an chang ve ve.

Zanin dar 12:30 hian Johan Cruyff Arena-ah Ajax-in Dortmund an mikhual dawn a, match thum khelhna tur chauh la ni mah se group C hmahruaitu zawnna a ni thei ang.

Ajax hian kartawp khan Heerenveen 2-0 in an hneh a, Sebastian Haller leh David Neres ten goal an khung. Ivorian forward Haller hian Champions League match hnih lek a khelhah goal nga a khung a, Dortmund tan ven uluk a ṭul ang.

Dutch club leh Dortmund hi tun hnaiah inanna deuh an nei a, player ṭha chhertu tihin an sawi theih. Ajax tlarhmaa awm Steven Berghuis, Antony leh David Neres te hi Europe club lian te en thlak an ni tawh a, tlarhnungah pawh Noussair Mazraoui leh Jurrien Timber te chu club lianin an hel ṭan der tawh.

Dortmund pawhin kartawp khan Mainz 3-1 in an hneh a, captain Marco Reus-a'n goal a khung bakah Erling Haaland-a'n goal hnih a khung. Norwegian striker Haaland hi khawvel striker ṭha ber zinga la chhal thei tur khawpa theihna a nei a, rawlthar ṭha dang pawh an ngah. Jude Bellingham, Giovanni Reyna, Reinier Jesus leh Youssoufa Moukoko te chu hmabak nei êng zinga mi an ni.

Hriat tel tur erawh Ajax leh Dortmund hi November 3 zanah an inkhel lehnghal dawn a, vawi hnih chak loh a pawi thei. Group C inkhel dangah Besiktas leh Sporting te ṭum hnih an inkhel ve dawn a, inkhel result a zirin he group aṭanga knockout stage lut tur chiang tawha ngaih hi a la chiang lo thei bawk.