Scotland-in Bangladesh barakhaih

T20 Cricket World Cup chu Pathianni tlai aṭang khan khelh ṭan a ni a, match hmasa berah Oman chuan Papua New Guinea chu wicket 10-in an sawp. Inkhel hnuhnung zawkah first round paltlang tura rinkai Bangladesh chu Scotland lakah 6 runs-in an tlawm.

Vawiin hian match khelh chhunzawm leh a ni dawn. Tlai dar 3:30-ah Scotland leh Papua New Guinea te an inkhel ang a, zan dar 7:30-ah Oman leh Bangladesh te an inkhel ang.

Oman an chak nuamsa
Oman Cricket Academy Ground-a inkhelah Oman-in vawm hmasak an thlang a, Papua New Guinea-in Assad Vala (56) leh Charles Amini (37) te zarah 129/9 runs an siam.

Oman opener pahnin Jatinder Singh (73*) leh Aqib Ilyas (50*) ten half century an siam ve ve a, thi loin over 13.4 lekah 131/0 runs siamin hnehna an chang.

Result danglam
Inkhel hnuhnung zawkah Bangladesh-in vawm hmasak an thlang a, Scotland tan Chris Greaves (45), George Munsey (29) leh Mark Watt (22) te che ṭhain over 20-ah 140/9 runs an siam.

Bangladesh tan target harsa ni pawhin lang lo mah se opener pahnih Liton Das (5) leh Soumya Sarkar (5) te an thi holam hret a, Shakib Al Hasan (20) leh Mushgiqur Rahim (38) te hmagin chak beiseina nei mah se run rate ngai zat a tam zel avangin loh theih loin risk lak a ngai.

Tigers hian over tawp berah four runs vawi hnih leh six run vawi khat vaw chhuak mah se a tlai deuh hret a, over 20-ah 134/7 siamin run rukin Scotland run siam zat an pha lo.

Engtin zel?
First round-ah hian team riat an awm a, group hnihah ṭhenhran niin a sang pahnih ve vein Super 12 an lut dawn. Group B-ah Oman, Scotland, Bangladesh leh Papua New Guinea te an awm. Zanin hian Bangladesh-in inlena thlengtu Oman an hneh lo a, Scotland an chak bawk chuan Tigers hi match hnihna lekah an tla dawn.

Group A-ah Ireland, Namibia, Netherlands leh Sri Lanka te an awm thung a, he group hian nizan aṭang khan an khel ṭan. Super 12-ah hian ram ṭha pariat India, Afghanistan, Australia, England, New Zealand, Pakistan, South Africa leh West Indies te an awm sa a ni.