NT-a tan WBC Asia title a chiang?

Mizo boxer lar NT Lalbiakkima'n WBC Asia title a beiseina chu a tak ram a chang dawn niin a lang a, Siaha tlangval hian professional fight a hmachhawn hmasak berah WBC champion kawnghren a beisei thei dawn.

VN Promotions hnuaia contract nei mek NT-a hian South Korea-ah training nei mekin professional boxer ni turin a inzir a, a fight neih hmasak berah hian round 10/12 chu fight nghal tura beisei a ni. 

Amateur boxing-ah round thum an inhnek tlangpui a, professional huang chhunga a zuan luh vawi khatnaah NT-a hian round 10 tal chu a hmachhawn nghal dawn tihna a ni - a awlsam lo ang. 

June 8, 2018-a world number 1 leh Olympic champion Hasanboy Dusmatov a hneh avanga Indian boxing-a hriat hlawh NT-a chuan, "Theihtawp chhuahin kan hotuten hma an la a, kuminah title fight ka neih tur hi an tichiang tawh. 

"Chutihrualin WBC Asia strawweight title hi kawltu awm loin a ruak mek a, hei vang hian ka hmachhawn tur berah hian thutlukna siam theih a la ni lo," tiin Vanglaini a hrilh.