Federer tan season a tawp

Roger Federer chu tun season chhungin a inkhel ve thei tawh dawn lo. Swiss star hi a vawi hnih nan a khup dinglam zai a ni a, a hliam vang hian hun rei tak chhung chu inkhel loin a inenkawl chhunzawm rih a ngai dawn.

Grand Slam vawi 20 champion tawh Federer hi January thla a khelh zawh Australian Open-ah khan a inhliam a, a hnu lamah a la inkhel leh rih lo. Beiseina sang tak nen tun season chhunga inkhelh leh ngei tum mah se a thei dawn ta lo.

Kum 38 mi Federer chuan, "Tunah chuan kum 2021 season kan hman hunah ṭha taka ka inkhelh leh theih nan beiseina ka nei," a ti. Tennis ngaina tute tan chanchin ngaihthlak nuam lo tak a ni ang.

Twitter lamah tarlangin Federer chuan, "Hliam vangin hun rei deuh tak chhung chu ka inenkawl tawh, inkhel leh vat turin beiseina sang tak nei mah ila tun hnaiah ka dinhmun endik a ni a, hnaivai taka inkhel thei ka la ni lo.

"Kum 2016 pawh khan hliam vangin hma takah season ka titawp tawh a, a kum lehpekah ṭha taka ka inkhelh theih nan leh 100%-a ka dam theih hun ka nghak, khatiang bawk khan nakkumah ṭha zawka kan inhmuh theih ka beisei," a ti.

Tennis season hi coro­navirus vangin an chawl lailawk mek. July thla tawp lamah chuan inkhelh chhun­zawm leh theih an inring, world number 4 hian Grand Slam khelh hmabak US Open leh French Open-te chu a khel dawn lo tihna a ni ang.