Manchester United khingpui tur Atalanta

Zanin dar 12:30 hian Manchester United-in Champions League match pawimawh takah Atalanta an mikhual dawn. Ole Gunnar Solskjaer-a hote match hnuhnung pasarihah vawi hnih chauh an chak a, vawi li ngawt an chak loh avangin an phurna pawh a tlahniam hle.

Man United thuneituten Solskjaer-a ban tumna an la nei lo a, chutihrualin result ṭha an neih loh chuan Norwegian manager hi a him reng lo ang. Italian club laka English club khelh dan hian Solskjaer-a hmalam hun thui tak a hril a rinawm.

Group F inkhel dangah zanin dar 12:30 hian Young Boys-in an mualah Villarreal an mikhual dawn a, season liam ta Europa League champion Yellow Submarine hian point khat chauh an la hmuh avangin knockout stage lut turin chak an mamawh.

Bissaka hremna titawi
Man United-in Young Boys an hneh loh ṭuma hnawhchhuah right back Aaron Wan-Bissaka hremna chu match hnih aṭanga match khata an tihhniam avangin Atalanta a hmachhawn dawn.

French defender Raphael Varane erawh inhliam vangin a la inlan thei dawn lo. Amaherawhchu kartawp inkhelah Harry Maguire a rawn let leh thei tawh a, tlarhnungah Maguire leh Victor Lindelof te an inkawp leh a rinawm.

World Cup qualifier khelh vanga kartawpa inlan thei lo Fred leh Edinson Cavani te an chhawr thei tawh dawn a, Marcus Rashford goal nena a rawn kir bawk avangin hliam vanga Anthony Martial awm loin nghawng a nei lian lo ang.

Atalanta-in zai vangin centre back Berat Djimsiti an chhawr thei dawn lo a, Germany international Robin Gosens bakah Italy international pahnih Matteo Pessina leh Rafael Toloi te hliam vangin an chhawr thei dawn lo - channa lian tak a ni.

Beisei pha lo
Nipui bazar hun hmang ṭha Manchester United-in tun hnaiah beisei an pha lo a, Ole Gunnar Solskjaer hnuaiah khelh dan phung nghet an nei lo. Player theihna nei sang Paul Pogba, Jadon Sancho leh Maguire te player satliah an ni.

Foxes an hneh loh ṭumin Maguire a khel chhe takzet a, academy player club tana a vawi khat bul ṭanna chu ni ngat se first team tan a khel leh lawk lo ang. Amaherawhchu Maguire hi khawvela defender man to ber a ni miau a, Atalanta lakah pawh bul a ṭan dawn.

Man United hian tun season-ah Wolves lakah chiah goal an chhuah lo a, clean sheet an neih ṭum pawh hi tlarhnung phui vang aiin Wolves tlarhma finishing ṭhat tawk loh vang a ni zawk.

Tlarhma lamah Cristiano Ronaldo-a'n bul ṭan ṭha viau mah se Solskjaer-a'n kum 36 mi Ronaldo hi a la chhawr thiam tawk lo. Ronaldo, Mason Greenwood leh Sancho te chawm tura Bruno Fernandes leh Paul Pobga te an awm chungin Man United goal bawh a na lo.

Solskjaer-a tana chanchin lawmawm erawh Rashford a dam ṭha tawh a, Leicester City laka goal a khung nghal avangin Atalanta lakah hian bul a ṭan a rinawm hial. Amaherawhchu 'team' angin an khel thei ang em, tih hi zawhna a ni a, tun thleng hi chuan Man United hi an chak ṭumah pawh player neih ṭhat vanga chak hram hram an ang zawk.

Fiahna hautak
Atalanta hi an hming aṭanga teh chuan Serie A club tenau ni awm an ni a, mah se tun hnaiah erawh Italian club ṭha zingah an tel phak. Kum 2017 khan league-ah palina an ni a, hemi hnu hian a sang pali zinga tel phak loh chu ṭum khat chauh an nei.

Season liam ta khan Atalanta hi Liverpool, Ajax leh Midtjylland te nen group khata an awm chungin knockout stage an lut thei a, an ṭha ve tawk tih an pholang.

Atalanta ṭhatna chu goal an khung theihna hi a ni a, season liam taah pawh Liverpool nen group stage-ah goal 10 ve ve an khung. Serie A lamah pawh La Dea (Atalanta kohna) hian goal 90 an khung a, champion Inter Milan (89) aiin goal an khung tam zawk.

Tun season-ah pawh Atalanta hian goal an khung chhe lo a, league match riat aṭangin goal 14 an khung tawh. Tlarhnung pawp ve tak Man United tan Atalanta tlarhmaa awm Duván Zapata leh Josip Ilicic te chu buaipui tham an ni ang. Chutihrualin Atalanta-in an player pawimawh pali an chhawr thei dawn lo a, mahni muala khel tur Solskjaer tan chak theihna hun ṭha a ni thei ang.