Sangtea a inbuatsaih ṭha

Mizo tlangval Lalrin-sanga Tlau chuan WBC youth champion a nih hnua a fight hmasa ber atan inpuahchahna a neih ṭhat thu leh Georgian boxer Ilia Beruashvili hmachhawn tura a inpeih tawh thu Vanglaini a hrilh.

Kum 21 mi Sangtea hian March 6 khan Ghanaian boxer Eric Quarm hnehin WBC Youth World Super featherweight title a la. Khawhruhlian tlangval chuan, "Title fight hnu khan Covid-19 vang leh chhan dang vangin fight ka hmachhawn leh lo a, training ka nei mumal thei lo bawk. Amaherawhchu October 9 khan Dubai ka thleng a, fight hmachhawnna tur hmun ka thlen hnuah erawh training ka nei ṭha hle," tiin a sawi.

A training dan chung-chang sawiin Sangtea chuan, "Cuban coach hnuaiah training ka nei a, Cuban boxer ho nen training kan neih ho theih avangin thil thar ka hriat belh hnem khawp mai. Skills hrim hrimah chuan ka ṭha zawk mahah ka inngai a, mah se daih rei lamah erawh ka tluk lo. An tuarchhel em em a, an bula training ka nei thei hi ka lawm hle," tiin Vanglaini a hrilh.

Sangtea leh Berua-shvili te inhnek hi Zonet kaltlangin a en theih dawn a, Mizo tlangval inhnek thlir duh tan mahni cable operator te biak mai tur a ni. Online hmanga en duh tan https://in.bookmyshow.com/spor... ah a en theih bawk.

Mizo tlangval hian Grassroot Boxing Promo-tions and Management hnuaiah contract a nei a, tun ṭuma an inhnekna tur pawh hi Grassroot Boxing buaipui vek a ni.

Dubai Fight Night-ah hian Sangtea te inhnek bakah fight dang hmuhnawm tak tak thlir tur a awm dawn a, main event atan WBO Cruiserweight African Championship chu hman a ni dawn. Cameroonian boxer Rolly Lambert Fogoum leh Ghanaian boxer John Napari ten African WBO Cruiserweight champion an zawng ang.

Dubai Fight Night
October 23, Inrinni

Welterweight
Marco, Cuba 10:10 PM Hail Mohamed, Morocco

Superfeather
Lalrinsanga Tlau, India 10:35 PM Ilia Beruashvili, Georgia

Superwelter
Faizan Anwar, India 11:05 PM Octavian Gratii, Romania

Supermiddle
Stepahne Fondjo, Cameroon 11:45 PM Lago Kiziria, Georgia

Superfeather
Jadier Herrera, Cuba 12:15 AM Resnu Sundava, Indonesia

WBO Cruiserweight African Championship
Rolly Lambert Fogoum, Cameroon 12:35 AM John Napari, Ghana