Denmark Open-ah Sindhu

Tokyo Olympic hnuaah PV Sindhu a chawl lailawk reng a, tunah chuan inelna a hmachhawn leh dawn ta. Tunkar chhunga khelh tur Denmark Open-ah Sindhu hi a inlan dawn, nomawi chawi bakah ranking tih san nan chak ngei a tum.

Rio leh Tokyo-ah Sindhu hian India tan medal a la thei, hripui leng vangin world championship khelh a ni rih lo bawk a, tunah hian Sindhu hi world champion a ni mek a, a ranking erawh pasarihna a nih avangin tih san a mamawh viau.

Kum 26 mi Sindhu chuan, "Taksa leh rilruin chawlh a mamawh a, chumi vang chuan hun rei tak ka inkhel lo. Tournament ka khelh loh vang khan ka chawl mai mai tihna erawh a ni lo, ṭha zawka lo kir leh turin training ka nei reng.

"Ka khelh dan phungah pawh hma ka la sawn zel a, nitin zir belh ka ka nei. Denmark-ah hian a sang thei ang ber thlen ka tum, nomawi chawi mai bakah ranking point hmuh pawh a pawimawh dawn hle," tiin a sawi.

India nula zingah Sindhu bakah hian Saina Nehwal pawh a inlan dawn. London Olympic bronze medalist Saina hi tun dinhmunah world number 19 a ni a, a ranking a san loh avangin round tir lamah pawh player langsar a hmachhawn a ngai dawn.

Nimin khan mipa singles an khel ṭan. India player zinga medal dawn beisei phak Kidambi Srikanth chuan amah ang bawka Indian player B Sai Praneeth chu darkar chanve chhungin 21-14,21-11 in a hneh.

Inkhel dangah Sameer Verma pawhin Thailand tlangval Kunlavut Vitidsarn chu 21-17, 21-14 in a hneh a, world number 21 hneh tur hian minute 42 hun a mamawh a ni.