Chak mamawh Chelsea mualah Malmo

European champion Chelsea chuan zanin dar 12:30-ah Champions League match an khel dawn a, an mikhual tur Malmo an nih avangin an inringtawk khawp ang.

Hriat tel tur erawh Blues hian tun season Champions League-ah match hnih khel tawhin point thum chiah an la nei a, last 16 luh an duh a nih chuan hneh ngei tura ngaih Malmo lakah chetsual a thiang lo.

Group H inkhel dangah zanin dar 12:30-ah vek Juventus an inlan dawn a, an lenchilh tur hi Zenit Saint Petersburg an nih avangin Italian club tan hna a awlsam ring suh.

Beisei phak lo?
Chelsea-in Premier League-ah hma an hruai mek a, 'beisei phak lo' tia an chanchin sawi hi fans tan a na deuh mai thei - mahse, inelna hrang hranga an match hnuhnung pali aṭanga teh chuan a dik thlap.

September thla tawp lama Manchester City an ngam loh hnu khan Chelsea hian Champions League-ah Juventus chu 1-0 in an ngam lo zui a, group stage match hnih aṭangin point thum chiah an la neih phah. Thomas Tuchel-a team te an insiamṭha vat a, Southampton (3-1) leh Brentford (1-0) an ngam zui. Mahse, Brentford nena an inkhel thlir chuan Chelsea an vannei tih an hmu ang.

Brentfordf lakah goalkeeper ṭha mi Edouard Mendy-a'n a chhanhim tiin a sawi theih a, Malmo hian tun season inelna hrang hrang match 30-a goal 16 khung tawh Antonio Colak, match 30-a goal 11 khung tawh attacking midfielder Veljko Birmancevic te an nei a, Stamford Bridge-ah goal khung an tum ngam dawn - Blues tan zuamsual theih an ni.

Chak a ngai
Blues tan sawiseltute chhanglet turin zaninah chak ngei a ṭul a, chutiang ti thei tur chuan player pawh an nei. Tlarhnungah Antonio Rudiger la inhliam mah se international break aṭangin Thiago Silva a lo kir tawh a, Andreas Christensen leh Malang Sarr an inkawp thei ang.

Christian Pulisic chu hliam vangin a inlan thei dawn lo a, Hakim Ziyech a dam chiang lo bawk. Chuti a nih chuan tlarhmaah Romelu Lukaku thlawp turin Timo Werner leh Mason Mount an awm thei dawn a, Chelsea tlarhma an hriam dawn.

Hetihrual hian Malmo hian hrem vangin forward Anel Ahmedhodzic an chhawr thei dawn lo a, Oscar Lewicki, Jonas Knudsen, Ola Toivonen leh Felix Beijmo te chu hliam vangin an chhawr thei dawn lo - Chelsea tan chak loh chi a ni lo a, an tlawm a nih ngat chuan last 16 beiseina a tlem sawt ang.

Juve lam hi
Serie A lama 1-0 a AS Roma hneh hlim an ni a, Champions League match hnih an khelh tawhah an chak ve ve bawk - Malmo (3-0) leh Chelsea (1-0) chungah zahngaihna an lantir lo a, Zenit lakah pawh inthlahrun an tum lo ang.

Juve tan hliam vangin Matthijs de Ligt inlan thei dawn lo mah se Leonardo Bonucci leh Giorgio Chiellini an awm avangin lungphanna tur a awm lo a, AS Roma lakah Alvaro Morata a lo kir leh tak bawk avangin tlarhma pawh an ngaihtuahawm loh.

Paulo Dybala la dam lo mah se Roma laka goal khungtu Moise Kean a la awm cheu a, Covid-19 vangin Adrien Rabiot a inlan thei dawn lo bawk - Zenit hi mahni muala inkhel tur an nih avangin tawh an khirh ang tih a chiang a, tun season-a goal ruk khung tawh Sardar Azmoun an neih bawk avangin Juve tan chetsual theihna tur an ni.