Arsenal-in point an hmu hram

August thla pumpuiah an chak lo a, September thlaah an chak vek a, October thla kal mekah Premier League match hnih khel tawhin Arsenal chu an khingpui nen an la inhnehtawk ve ve - Mikel Arteta naute hi an la ngelnghet lo takzet.

Thawhṭanni zan Premier League inkhelah Gunners hi an mikhual Crystal Palace nen 2-2 in an inhnehtawk, hun tawp dawna Alexandre Lacazette goal hmangin Gunners hian point khat an sual chhuak hram.

Inhnehtawk
Emirates Stadium-ah goal kan hmu hma, minute riatna lekah Pierre-Emerick Aubameyang-a'n a khung. Nicolas Pepe-a shot chu keeper Vicente Guaita-a'n lo dang mah se, ball per hi leia a tlak hmain Aubameyang chuan a tlawh goal.

Chawlhlawk hmain team pahnih an innawr tawn zak zak a, goal erawh kan hmu chhunzawm lo. Second half minute 50-naah Christian Benteke chuan amah vengtu Gabriel a paltlang hnuah si phurh a sut a, manager Patrick Vieira chu a hmelah a lawm tih a lang.

Albert Sambi Lokong-a'n Conor Gallagher a veng hneh lo a, sir ve deuh tak aṭangin Odsonne Edouard chuan an goal hnihna a khung - keeper Aaron Ramsdale khan a chhuah ho angreng tia sawi theih a ni, a lu chung zawn maia mi a nam per hman lo.

Gunners an tlawm duh bik lo, hun tawp dawn thlengin thapui thawhin an nawr. Hamrik hnuhnung rik hma deuhin Lacazette chuan buai nuaih karah si phurh a sut. France international hian a goal khung a lawm, ball la chunga tlan let vat zawk awm tak a ni.

Kir lehna
Arsenal hian an captain ropui ni ṭhin Patrick Vieira chu a vawi khat nan an mikhual. France international hlui hian Gunners a chhuahsan hnua a tlawh lehna hmasa a ni a, a club hmangaih tak ni ṭhin lakah Palace chu chakpui a tum hle - a tawpah erawh an vannei tluan thei ta lo.

Emirates Stadium chhunga inkhel entuten Vieira hi ṭha takin an lo dawngsawng. Premier League nomawi vawi thum chawipui tawhtu a nih miau avangin fans lam tan auh el ngawt chi a ni lo, zah taka lo dawnsawn hi a phu.

Vieira chuan, "Ka beisei aia ṭhain min lo dawngsawng a, ka lawm takzet. Chutih rualin season kua teh meuh thi leh thau pawlhin Arsenal tan hian ka lo bei ve tawh, hlawhtlinna changtu zingah pawh ka lo tel ve tawh a, ka tan chuan khang hun te kha a hlu hle," a ti.

France international hlui kaihhruaina hnuaiah Palace hi tun hnaiah an khel ṭha viau, an match hnuhnung parukah vawi khat chiah tlawm an nei. Gunners lakah an thiampuipa Wilfried Zaha chu damlohna avangin chhawr thei lo mah se an goal nawr a hlauhawm thei hle.

Xhaka tel lo
Mikel Arteta-a'n hliam vangin Granit Xhaka a chhawr thei lo a, Switzerland international tel lo chuan North London club hi an midfield a thawl deuh tih a lang a, a nghet tawk lo bawk - an goal chhuah pahnih kha Thomas Partey leh Sambi Lokonga tihsual kal zel a ni.

Chhuanlam tur an zawng duh a nih chuan an vannei tawk lo bawk. English rawlthar Emile Smith Rowe khel ṭha mah se Tottenham an hmachhawn ṭum angin goal hmaah a hriam tawk lo, defender Kieran Tierney-a'n hnai taka bar a tih per dawp kha lut se result a la danglam hman mai thei bawk.

Bukayo Saka chu James McArthur-a'n chiang takin a hliam a, thlak a ngai hial. McArthur hi red card pek tur niin lang mah se yellow card a hmu a, a vannei hle. Gunners manager Arteta chuan, "Red card tur chiang tak a ni.

"Ball pawh tum loin mihring tih nat a tum, VAR hmang pawha an hnawt chhuak lo kha a mak a ni," tiin a sawi. Palace midfielder McArthur hi hnawt chhuak se la chuan minute 45 chhung vel kim loa an khelh a ngai dawn tihna a ni a, result a tidanglam ngei ang.