T20 FESTIVAL

Vivo Indian Premier League vawi 14-na chu harsatna hranpa em em awm loin UAE-ah an khel zo ta. Chennai Super Kings-in a ṭum li nan Champions Trophy-ah an hming an chhu kai. UAE-ah hian ICC T20 World Cup khelh zui a nih dawn avangin IPL khawmpui pandal pawh ṭhiah a ngai lo a, player-te pawh champion lawm tura haw hman loin an cham tlang a ṭul.

Pathianni aṭang khan ICC T20 World Cup khuh hawnna neih lehnghal a ni a, first round chauh a la nih avangin team ṭha pariat an la awl. Oman khawpui Muscat leh UAE khawpui Abu Dhabi leh Sharjah-ah first round hi khelh a ni a, team pariat chu group hnihah ṭhen niin a sang pahnih ve ve Super 12 khel turin an tling ang.

First round-ah hian group A-ah Oman, Scotland, Bangladesh leh Papua New Guinea te an awm a, group B-ah Ireland, Namibia, Netherlands leh Sri Lanka te an awm thung. Super 12-ah hian ram ṭha pariat India, Afghanistan, Australia, England, New Zealand, Pakistan, South Africa leh West Indies te an awm sa.

First round-ah hian Test khel pha ram Sri Lanka, Bangladesh, Ireland tih vel an kat nuk a, UAE leh Oman lam boruak chu a khawchin leh a cricket angin a 'hot' em em vek mai dawn a ni.

IPL to T20 World Cup
IPL 14-ah Ruturaj Gaikwad, Venkatesh Iyer, Avesh Khan, Harshal Patel ten hming an chher a, India ram national news headline an luah zak zak hnuah ni tam pawh a ral hmain T20 World Cup inelnaah mit kan len a ngai zui nghal.

Heng rawlthar khel ṭha tak tak te erawh India team lamah an hmel kan hmu dawn hrih lo a, India tana khelh phak hi a awlsam lo tih a chiang hle. India team thlan danah hian kalphung mumal tak a awm a, Indian Premier League leh Ranji Trophy vela season hnih khat che ṭha thutte hi an kaisan tir nghal zung zung lo.

India team-a hmun sawhnghet tawh Virat Kohli, Rohit Sharma, KL Rahul, Jasprit Bumrah etc te zinga tal ve tur chuan an la nghah deuh a ngai a, chutihrualin tualchhung inelnaa che ṭhate hi chuan India team-a khelh an hnaih hret hret.

India team thlangtu 'selector' te ngaihtuahnaah an tel ṭan tawh a, tawnhriat nei zawkte nen pawh bukna lung khatah an awm ṭan. T20 World Cup lai hian, domestic cricket chu November thla hian khelh a ni ve dawn. Ram aiawha khel phak lo player ṭha rualte mahni state tan an inlan dawn.

IPL khel ṭha, tualchhung inelnaa che ṭha bawk chu rei hai theih a ni dawn chuang lo. Test team-a dinhmun sawhnghet mek Shubman Gill a tan pawh ODI leh T20-a India lukhum dawnna hun remchang a inher chhuak thuai turah a ngaih theih ang.

Chhandamtu Middle East
Cricket khawvela roreltu sang ber ICC chuan nikum lama Australia khelh daih tawh tur T20 World Cup chu Covid-19 vangin a hun an sawn. T20 World Cup hi kum zawna neih tum a ni a, kumin hi India rama neih tur ni mah se coronavirus vang thoin BCCI-in a thleng thei ta lo.

India hian inelna ngaihhlut IPL pawh Covid-19 third wave hlauh vangin a khel zo thei lo a, BCCI lamin IPL suan nan UAE an ṭahawh. ICC lam pawhin World Cup khelh nan sum leh pai lama buai lo Middle East ram UAE leh Oman ṭanpuina a ngen a, anni hian cricket inelna ngaihhlut hi an thleng.

Covid-19 vangin inelna thlen hi a hautak a, Middle East ram zarah IPL tluang takin an zo thei a, World Cup kan thlir phah thei dawn. Cricket khawvel tan chuan Middle East ram te hi chhandamtu ropui kan ti thei awm e.

Hamara Desh lam
Cricket World Cup khelh ṭan a ni ta a, cricket ngainatute hna ber chu 'vawm, vuak, en' a ni mai. Ni hmasa berah thilmak a thleng nghal a, Scotland-in Bangladesh an hneh! T20 game mak danglamna kan hmu a, tun favang chho World Cup chu kan hmu zeuh zeuh turah ngai bawk ila. Beisei loh thil i beisei phawt zel teh ang - T20 a ni tlat.

Kum 2007 khan ICC-in a vawi khat nan T20 World Cup hmasa ber chu South Africa-ah a nghat a, Mahendra Singh Dhoni hoa khel India-in senior player Sachin Tendulkar leh BCCI president ni ta Sourav Ganguly te ho hruai lo mah se rawlthar rual hoin an champion. Hemi hnu hian India-in champion hmel an hmu leh ta lo.

Khang hun laia Under 19 level 'lek' la khel Virat Kohli a pawh India captain a nihna aṭanga kum ruk a pum hlum hnai ta. Kohli tan T20 World Cup hi India tana a captain hnuhnun ber tur a ni a, a champion pui thei ang em, tih chu hunin a hril ang.

Khawvela batsman ropui ber zinga mi Kohli hian a captain-na hnuaiah India hi ICC trophy pakhat mah chawipui loin a liamsan thei a, India tan chauh ni loin Kohli tan pawh inelna pawimawh tak a ni.

Hemi thlentir lo tur hian BCCI lamin tun World Cup-a, India coaching staff-te fuih a, lo puibawm turin tu dang ni loin, kar hmasa lawka IPL champion captain MS Dhoni chu team mentor atan a ruat - Virat Kohli a mut a titui sawt ngei ang le.

India top order tun hnaia che ṭha zet mai KL Rahul leh tun World Cup zawha Kohli a captain ṭhutthleng luah tur Rohit Sharma leh amah Kohli a kutah ngei batting lam department ko rit zet mai a innghat dawn.

Vawm lam department-ah Jusprit Bumrah leh Mohammed Shami te inhliam loh a pawimawh ang. Tournament a rei deuh ang a, pitch a hlui ve telh telh ang a, a ṭhuai vir thiam Ravindra Jadeja leh hun rei tak India T20 team a tel tawh lo, tawnhriat nei ṭha Ravichandran Ashwin a awm hian tun dinhmunah chuan thla chu an timuang ngei ang.

Tin, Thawhlehni zan warm up match lama che ṭha tak rawlthar Ishan Kishan te che velin ngaih a ti ṭha rih hle. Hardik Pandya-a role erawh tournament ṭan hmain tihchian a pawimawh ang.

Engpawh nise, tun Pathiannia Dubai International Stadium-ah hmelma kumhlun Pakistan nen Super 12 bul ṭanna atan an han inkhuanuai tur hi a va nghahhlelhawm tawh tak em.

Inkhawmpui pakhat Indian Premier League a ṭiak a, T20 inkhawmpui lian dang pakhat World Cup chibai vek ule.

- K. Vanlalruata