Barcelona an tla dawn em?

Champions League-a sulhnu nei ṭha ber zinga mi Barcelona-in match hmasa pahniha Bayern Munich leh Benfica 3-0 ve vea an hneh loh avangin tla thei dinhmunah an ding. Ronald Koeman-a hote hian zanin dar 10:15 hian Nou Camp-ah Dynamo Kiev an mikhual dawn a, Catalan club tan insiamṭhatna hun ṭha a ni thei ang.

Group E inkhel dangah Benfica-in zanin dar 12:30 hian Bayern Munich an mikhual dawn. German club hian Julian Nagelsmann-a hnuaiah season bul an ṭan ṭha a, match hnih an khelhah an chak ve ve bakah goal riat an khung a, goal an la chhuah lo.

Nou Camp
Barcelona tan chuan Nou Camp hi an kulhpui tia sawi theih a ni a, tun hnaiah erawh result ṭha neih an harsat. Champions League bika an match hnuhnung pathumah goal thum an chhuah tling vek a; Bayern (0-3), PSG (1-4) leh Juventus (0-3) lakah an tlawm.

Lionel Messi-a'n a chhuahsan hnuah Barca hian Bayern leh Benfica 3-0 ve vein an hneh lo a, an sum dinhmun a ṭhat loh bawk avangin khelmual chhungah result ṭha neih an mamawh hle.

Europe lamah result nei ṭha tawk lo mah se La Liga lamah kar liam ta khan result duhawm an nei a, Nou Camp-ah Valencia 3-1 zeta an sawp avangin team boruak a ṭhat phah ang. La Liga inkhelah hian entu 47,317 an awm thei a, Covid-19 vanga entu awm mumal loh hnua an muala entu tam leh ber ṭum a ni.

Hriat tel atan a ṭha chu season liam taa PSG leh Juve an hneh loh ṭum khan entu an awm lo a, Kiev hunah mi 50,000 bawr vel entu an awm dawn avangin Nou Camp pawh Barcelona tan kulhpui a ni leh thei tawh ang.

Beiseina thar
Barca hi an match hmasa pahnihah chak lo mah se team nem bera ngaih Dynamo Kiev hi ṭum hnih an hmachhawn dawn a, an hmaah point ruk a inchhawp avangin point la hmu lo mah se knockout stage lut turin beiseina sang tak an la nei.

Kartawp inkhelah Messi number 10 kalsan hatu Ansu Fati a dam ṭha tawh a, Valencia lakah a thiamzia a pholang. Manchester City aṭanga Barca zawmtu Sergio Aguero pawhin khelmual a rawn rap leh tawh a, Ronald Koeman-a'n tlarhmaah duh thlan tur a ngah sawt.

Barca hian international break an hmang ṭangkai bawk. Spain manager Luis Enrique-a'n a club hlui player-te a ring ngam a, kum naupang zawk midfielder Gavi ten inrintawkna an ngah phah. Messi awm loh vangin Barcelona hi tlachhe duaia sawi a la rem lo. Valencia lakah pawh hian bench aṭangin Liverpool chhuanvawr ni ṭhin Philippe Coutinho te an luhtir thei a, Brazilian forward hian goal a khung nge nghe.

Catalan khingpui tur Dinamo Kiev hian Bayern lakah 5-0 ngawtin an tlawm a, dah hniam ngawt erawh a rem lo. Ukrainian club hian Benfica an chelh thei a, an ram league-ah Inter Milan chelh theitu Shakhtar Donetsk an chelh thei bawk. A tawi zawng chuan Koeman leh a hote tan fimkhur a ṭul ang.

En châkawm
Benfica-in Barcelona an sawp lai thlirtu chuan Portuguese club-in German champion Bavarians an mikhual tur hi an en châk ngei ang. Jorge Jesus hian tlarhmaah Darwin Nunez, Rafa Silva leh Roman Yaremchuk te a kawl.

Euro 2020 thlir ṭhin chuan Rafa Silva leh Yaremchuk an hria ang. Chutihrualin tun season-a Benfica top scorer Nunez hi hriat tel a ṭha. Uruguayan forward hi kum 22 mi chauh a ni a, 6ft 2in sang niin tun season match riat a khelh tawhah goal ruk a khung tawh.

Tlarhnungah veteran defender Nicolás Otamendi leh Jan Vertonghen ten an ho thei a, midfield-ah Joao Mario leh Julian Weigl te an kawl a, player hming nei an kat nuk. Bayern erawh champion rinkai ni pha khawpin an ṭha.

Polish striker Robert Lewandowski-a'n inelna hrang hrangah match 11 lek aṭangin goal 15 a khung der tawh a, Champions League bikah pawh match hnih lek aṭangin goal li a khung. Benfica tan Lewy hi ven uluk a ṭul dawn a, amaherawhchu Serge Gnabry, Leroy Sane leh Thomas Muller te an awm avangin mi pakhata insawrbing erawh a rem lo ang.