Sri Lanka leh Ireland an chak nuamsa

T20 World Cup first round-ah Sri Lanka leh Ireland ten an match hmasa berah harsatna nei loin hnehna an chang a, match khat chauh la khel mah se group A aṭanga Super 12 lut tur chu a rin thiam theih nghal.

Sheikh Zayed Stadium-ah Sri Lanka-in vawm hmasak an thlang a, Namibia hi over 19.3-ah vawm hlum vekin 96 runs chauh an siamtir. Lions bat hun a thleng a, Bhanuksa Rajapaksa (42*) leh Avishka Fernando (30*) te hmangin over 13.3 lekah 100/3 runs an siam a, wicket sarihin hnehna an chang.

Inkhel dangah Netherlands-in vuak hmasak an thlang a, Ireland bowler Curtis Campher an ngam lo. Campher hian wicket li lain 26 runs chauh a pe a, Netherlands tan Max O'Dowd-a'n half century (51) siam mah se over 20-ah 106 chauh an siam.

Ireland-in over 15.1 chhungin 107/3 runs siamin an target hi an umpha a, wicket sarihin hnehna an chang. Gareth Delany (44) leh Paul Stirling (30*) te chu Ireland tana khel ṭha zual an ni.

Vawiin tlai dar 3:30 hian Netherlands leh Namibia an inkhel ang a, zanin dar 7:30-ah Sri Lanka leh Ireland te an inkhel ve thung ang.