Mourinho-a'n Magpies enkawl a tum lo

Newcastle United-in neitu thar an neih hnuah fans an phur a, khawvela footballer langsar ber ber leh coach hlawh hnemte nen sawizawm an ni nasa hle - chung zinga langsar tak pakhat chu Jose Mourinho a ni.

Mahse, Chelsea boss hlui chuan, "Newcastle chungchangah hian eng mah sawi tur ka nei lo a, ka nei lo takzet. Ka sawi theih awmchhun chu Newcastle chanchina mi pawimawh ber Sir Bobby Robson hnuaiah khan rei tak chhung ka lo thawk tawh a, chumi avang chuan Newcastle khawpui leh fan te hian ka lung min len ṭhin a, mahse, chu aia ril zawk inzawmna erawh a awm lo," a ti.

English coach ropui Sir Bobby Robson-a'n Barcelona a enkawl lai khan Mourinho hi a assistant a ni ṭhin a, hemi hma hian Sporting Lisbon leh FC Porto-ah an thawk dun tawh bawk. Mahse, a pu hluiin 1999-2004 inkara Newcastle a lo enkawl tawh vang maia Magpies lam hawi a tum lo.

Khawvela coach hlawhtling ber pawl chuan, "Roma-a ka awm thei hi ka hlim takzet a, Roma leh Dan Friedkin (Roma neitu) te hma-chhawpah hian 100% in ka rilru ka pe a ni," a ti.

Roma hi an league match hnuhnung berah 1-0 in Juventus lakah an tlawm a, heti chung hian table-ah palina an la nei thei - league match riat an khelh tawhah vawi nga an chak a, vawi thum an tlawm.

Mourinho naute hian Ningani zan dar 10:15-ah Europa Conference League an khel zui dawn a, match hniha chak tawh chungin Norwegian club FK Bodø/Glimt chu khualmualah an lenchilh ang.