India-in England an hneh

T20 World Cup atana inpuahchahnaah India chuan ICC Academy Ground, Dubai-ah England chu wicket sarihin an hneh. Virat Kohli hote hian vawiin tlai dar 3:30 hian Australia nen friendly match an khel leh ang.

Ṭhumvawrah India an vannei a, vawm hmasak an thlang. England tan Jonny Bairstow-a'n 49 runs a siam a, IPL-a Chennai Supers Kings champion puitu player pawimawh Moeen Ali-a'n thi loin ball 20 lekah 43 runs vaw chhuak bawkin over 20-ah 188/5 runs an siam.

India bowler zingah Mohammed Shami a khel ṭha ber a, wicket thum lain 40 runs a pe thung. Men in Blue tan opener pahnih KL Rahul (51) leh Ishan Kishan (70*) te an che ṭha a, kum 23 mi Kishan hi inhliam vangin a chawlh a ṭul thung.

Captain Kohli-a'n 11 runs chauh rawn siam mah se Rishabh Pant (29*) leh Hardik Pandya (12*) te a tawp thlenga damin over 19-ah 192/3 runs siamin hnehna an chang.

T20 World Cup-ah hian India hi Super 12 aṭangin an inlan ṭan dawn a, Men in Blue hian an match hmasa berah an hmelma Pakistan chu October 24, Pathianni zan dar 7:30-ah an hmachhawn ang.