Ballon d'Or beiseitu Benzema

Karim Benzema chuan a career-a a vawi khat nan Ballon d'Or dawng thei dinhmuna dingah a inngaih thu a sawi a, khawvel footballer ṭha berin an dawn ṭhin chawimawina hi a dawng a nih chuan naupang a nih anga a duhthusam chu a thlen dik tur thu a sawi bawk.

Real Madrid striker hi Ballon d'Or dawng tur hian Lionel Messi, Robert Lewandowski, Cristiano Ronaldo leh Jorginho te nen hming langsar pawl an ni a, tun hnaia khel ṭha thei tak Mohamed Salah hming a ri thar bawk.

Benzema chuan, "Ballon d'Or dawn hi chu ka mangphan fo ṭhin. Ka idol Ronaldo (Brazil legend) leh Zizou (Zinedine Zidane) te khan Real Madrid panin he chawimawina hi an dawng a, an hun tawn ropui ang hi tawn ve duhin ka suangtuah fo ṭhin.

"Ka naupan laia ka suangtuah leh mangphan ṭhin zinga mi a ni a, Ballon d'Or hi ka hlat lutuk loin ka hria," a ti a, beiseina a nei sang hle.

Kum 2018 khan Real midfielder Luka Modric chuan Ballon d'Or chawimawina hi a lo dawng tawh a, kum 2008 hnua Messi emaw Cristiano emaw tih loha he chawimawina dawng thei awmchhun a ni.

November 29-a sem chhuah tur Ballon d'Or dawng thei tur hian player 30 hming chhawpchhuah tawh a ni a, chhawpchhuah zingah Benzema a tel - player 30 zinga a hming a lan vawi 30-na a ni a, a dawn teuh ber erawh kum 2014 kha niin 16-na a ni ve hram!

Kum 33 mi striker hian season hmasa khan Real tan inelna hrang hrangah match 46 khelin goal 30 a khung a, assist vawi kua a nei a, nomawi chawi an nei lo thung.

Tun season-ah pawh Benzema hian match sawm khelin goal sawm a khung der tawh a, assist vawi sarih a nei - UEFA Nations League-ah France a champion pui a, final-a 2-1 a Spain an hnehna inkhelah si phurh sutna goal khungtu a ni a, Ballon d'Or hi a dawng a nih ngat chuan kum 1998-a Zidane hnua French footballer zinga he chawimawina dawng leh hmasa ber a ni ang.